बाँके वैशाख २३ गते ।
नेपालगन्जमा एक युवकको हत्या प्रकरणमा संलग्न रहेको आरोपमा प्रहरीले ६ जनालाई पक्राउ गरेको छ। जिल्ला प्रहरी कार्यालय बाँकेले मंगलबार प्रेस विज्ञप्ति जारी गर्दै घटनाको सफल अनुसन्धान भएको जनाएको छ।
प्रहरीका अनुसार वैशाख १२ गते बेलासपुरमा आयोजित एक कार्यक्रममा सहभागी व्यक्तिहरूबीच सामान्य विवाद उत्पन्न भई घटना भएको हो। कार्यक्रमपछि सँगै बसेका व्यक्तिहरूबीच विवाद चर्किँदै जाँदा दीपेन्द्र राज गिरी र विशाल चन्द ठकुरीबीच झगडा भएको बताइएको छ।
विवादपछि दीपेन्द्रले आफ्ना साथीहरूलाई बोलाएपछि दुई समूहबीच झडप भएको थियो। सो क्रममा कुटपिटबाट गम्भीर घाइते भएका विशाल चन्द ठकुरीलाई उपचारका लागि सञ्जीवनी कलेज अफ मेडिकल साइन्समा लगिएकोमा उपचारकै क्रममा मृत्यु भएको प्रहरीले जनाएको छ।
घटनामा संलग्न रहेको आरोपमा प्रहरीले कैलाली, बाँके, कालिकोट र सुर्खेतका ६ जनालाई पक्राउ गरेको छ। पक्राउ पर्नेहरूमा दीपेन्द्र राज गिरी, बिबियस कुँवर, सुशील खत्री, खगेन्द्र देवकोटा, सन्तोष संज्याल र रूपेश थापा रहेका छन्।
जिल्ला प्रहरी कार्यालय बाँकेका प्रवक्ता डीएसपी दीपक पातलीका अनुसार घटनाको सूचना प्राप्त हुनासाथ प्रहरी टोली सक्रिय रूपमा परिचालन भई अनुसन्धानलाई तीव्र बनाइएको थियो। “घटनामा संलग्न व्यक्तिहरूको पहिचान गरी छोटो समयमा नियन्त्रणमा लिन सफल भएका छौं, साथै थप अनुसन्धान प्रक्रिया अगाडि बढाइएको छ,” उनले बताए।
प्रहरीले घटनास्थलबाट एक थान चक्कु, मोटरसाइकल तथा बियरका बोतलहरू समेत बरामद गरेको जनाएको छ। घटनाबारे थप अनुसन्धान भइरहेको जिल्ला प्रहरी कार्यालय बाँकेले जनाएको छ।
Discussion about this post