बाँके वैशाख ३१ गते ।
बाँके जिल्लामा पछिल्लो समय क्षयरोगका बिरामीको संख्या बढ्दो क्रममा रहेको पाइएको छ । स्वास्थ्य कार्यालय बाँकेका अनुसार एआई एक्स–रे विधिबाट समुदायस्तरमा सक्रिय खोजपड्ताल अभियान तीव्र पारिएपछि नयाँ बिरामी पहिचान हुने क्रम बढेको हो ।
स्वास्थ्य कार्यालय बाँकेका क्षयरोग फोकल पर्सन रविन्द्रकुमार शाहका अनुसार चालु आर्थिक वर्षको साउनदेखि चैत मसान्तसम्म ७२९ जना क्षयरोगका बिरामी फेला परेका छन् । एआई एक्स–रे प्रविधिको प्रयोगमार्फत समुदायमै पुगेर गरिएको परीक्षणका क्रममा बिरामी पहिचान गरिएको उनले बताए ।
कार्यालयका अनुसार सबैभन्दा बढी बिरामी नेपालगन्ज उपमहानगरपालिका र कोहलपुर नगरपालिकामा भेटिएका छन् । नेपालगन्जमा २०० जना तथा कोहलपुरमा १२९ जना क्षयरोगी पहिचान भएका छन् ।
त्यसैगरी बैजनाथ गाउँपालिकामा ९३, खजुरा गाउँपालिकामा ९२, डुडुवा गाउँपालिकामा ६२, जानकी गाउँपालिकामा ५८, राप्तीसोनारी गाउँपालिकामा ५० तथा नरैनापुर गाउँपालिकामा ४५ जना क्षयरोगका बिरामी फेला परेका स्वास्थ्य कार्यालयले जनाएको छ ।
फोकल पर्सन शाहका अनुसार गत आर्थिक वर्षमा बाँकेमा कुल १ हजार १८२ जना क्षयरोगका बिरामी फेला परेका थिए । चालु वर्षको नौ महिनामै करिब ८ सयको हाराहारीमा नयाँ बिरामी पहिचान भइसकेकाले जोखिम अझै उच्च रहेको संकेत देखिएको उनले बताए ।
पछिल्लो समय समुदायस्तरमा सञ्चालन गरिएको सक्रिय खोजपड्ताल शिविरबाट पनि नयाँ बिरामी फेला पर्ने क्रम जारी रहेको छ । नेपालगन्ज र खजुरामा हालै सञ्चालन गरिएको शिविरबाट मात्रै १४ जना क्षयरोगी पहिचान भएका छन् ।
नेपालगन्ज उपमहानगरपालिका स्वास्थ्य महाशाखाका जनस्वास्थ्य निरीक्षक तथा क्षयरोग फोकल पर्सन विनोद विकका अनुसार वडा नं. १२, १४, २०, २१ र २२ मा ८ जना क्षयरोगी भेटिएका छन् । तीमध्ये एक जनाको अवस्था जटिल रहेकाले भर्ना गरेर उपचार गर्नुपर्ने अवस्था रहेको उनले जानकारी दिए ।
यस्तै खजुरा गाउँपालिकामा ६ जना क्षयरोगी फेला परेका छन् । तीमध्ये वडा नं. ८ का एक बिरामीलाई पनि भर्ना गरी उपचार गर्नुपर्ने अवस्था रहेको स्वास्थ्य कार्यालय बाँकेले जनाएको छ ।
Discussion about this post