बर्दिया, जेठ १२ गते ।
बर्दियाको बढैयाताल गाउँपालिका–२ फुटाहा क्षेत्रमा रहेको नेपाल–भारत सीमा नजिकबाट प्रहरीले १६ लाख रुपैयाँभन्दा बढी मूल्यको तरबुजाको बीउ बरामद गरेको छ ।
सोमबार राति करिब २ बजे लुम्बिनी प्रदेश प्रहरी कार्यालयबाट खटिएको विशेष टोलीले सीमा क्षेत्रमा गस्ती गर्ने क्रममा नेपालबाट भारततर्फ अवैध रूपमा सामान लैजाँदै गरेको गतिविधि देखेपछि निगरानी बढाएको थियो । प्रहरी टोलीलाई देख्नासाथ तस्करीमा संलग्न व्यक्तिहरू सामान र साइकल छोडेर अँध्यारोको मौका छोपी फरार भएका प्रहरीले जनाएको छ ।
प्रहरीले घटनास्थलबाट ४० बोरा तरबुजाको बीउ बरामद गरेको छ । बरामद बीउको तौल करिब १६ क्विन्टल रहेको र यसको अनुमानित बजार मूल्य १६ लाख रुपैयाँ रहेको जनाइएको छ । साथै, घटनास्थलबाट ९ वटा साइकल पनि नियन्त्रणमा लिइएको छ, जसको अनुमानित मूल्य १३ हजार ५ सय रुपैयाँ रहेको छ ।
बरामद गरिएका सामानको कुल मूल्य १६ लाख १३ हजार ५ सय रुपैयाँ पुगेको प्रहरीले जनाएको छ । घटनाबारे थप अनुसन्धान भइरहेको तथा बरामद सामान आवश्यक कारबाहीका लागि इलाका प्रहरी कार्यालय मैनापोखर, बर्दियामा बुझाइएको प्रहरीले जानकारी दिएको छ ।
Discussion about this post