बाँके, जेठ १९ गते ।
सशस्त्र प्रहरीले बाँके जिल्लाका विभिन्न सीमा नाकाबाट ठूलो परिमाणमा अवैध सामान तथा तिनको ओसारपसारमा प्रयोग भएका सवारी साधन बरामद गरेको छ।
सशस्त्र प्रहरी बल नेपाल नं. ३० गण हेडक्वार्टर बागेश्वरी तथा मातहतका विभिन्न सीमा सुरक्षा पोष्ट (बीओपी) बाट खटिएका टोलीले सोमबार र मंगलबार गरी करिब २१ लाख ७९ हजार १८१ रुपैयाँ बराबरका अवैध सामान बरामद गरेका हुन्।
सशस्त्र प्रहरीका अनुसार भारतबाट अवैधरूपमा नेपाल भित्र्याइँदै गरिएका औषधि, लत्ताकपडा, पेय पदार्थ, किराना सामग्री, सुर्तिजन्य वस्तु, हरियो तरकारी, काठलगायतका सामान बरामद गरिएको छ। साथै ओसारपसारमा प्रयोग गरिएको एक थान मोटरसाइकल र एउटा ट्र्याक्टर पनि नियन्त्रणमा लिइएको छ।
यसैबीच, सशस्त्र प्रहरीले ६४० मिलिग्राम ब्राउन सुगर, २१० ट्याब्लेट ट्रामाडोल, ४० ट्याब्लेट नाइट्रोभेट र ६ ट्याब्लेट स्पास–प्रोक्सीभोनसहित दुई जनालाई पक्राउ गरेको जनाएको छ। पक्राउ पर्नेमा बाँकेको जानकी गाउँपालिका–५ गुरुवागाउँका ३० वर्षीय विष्णु यादव र दाङको तुलसीपुर उपमहानगरपालिका–३ दमारगाउँका २६ वर्षीय शेरबहादुर विश्वकर्मा रहेका छन्।
बरामद गरिएका अवैध सामान आवश्यक कारबाहीका लागि नेपालगञ्ज भन्सार कार्यालयमा बुझाइएको सशस्त्र प्रहरीले जनाएको छ। साथै लागूऔषधसहित पक्राउ परेका दुवै जनालाई थप अनुसन्धानका लागि जिल्ला प्रहरी कार्यालय बाँकेको जिम्मा लगाइएको छ।
सशस्त्र प्रहरी बल नेपाल नं. ३० गण हेडक्वार्टर बागेश्वरीमा एसपी भीमबहादुर चन्दले नेतृत्व सम्हालेपछि सीमा क्षेत्रमा निगरानी र चेकजाँच थप प्रभावकारी बनाइएको सशस्त्र प्रहरीका एक अधिकृतले बताए । सीमा नाकामा कडाइ गर्नुका साथै अवैध रूपमा भित्रिने सामान तथा लागूऔषध नियन्त्रणमा विशेष निगरानी बढाइएको जनाइएको छ।
पछिल्लो समय सशस्त्र प्रहरी बल नेपाल नं. ३० गणले सीमा क्षेत्रमा सुरक्षा निगरानी थप सुदृढ बनाउँदै चोरी–तस्करी नियन्त्रण, लागूऔषध बरामद तथा सीमा अपराध न्यूनीकरणमा उल्लेखनीय सफलता हासिल गर्दै आएको छ।
Discussion about this post