बाँके, असार १५ गते।
नेपालगन्ज भन्सार कार्यालयले चालु आर्थिक वर्ष २०८२/८३ को जेठ मसान्तसम्म लक्ष्यको ८३.०५ प्रतिशत राजस्व संकलन गरेको छ। गत आर्थिक वर्षको सोही अवधिको तुलनामा राजस्व असुलीमा करिब १० प्रतिशतले वृद्धि भएको कार्यालयले जनाएको छ।
कार्यालयका अनुसार २२ अर्ब ३७ करोड ४३ लाख ८३ हजार रुपैयाँ राजस्व संकलन गर्ने लक्ष्य रहेकामा जेठ मसान्तसम्म १८ अर्ब ५७ करोड ९९ लाख ५६ हजार रुपैयाँ राजस्व असुल भएको छ, जुन कुल लक्ष्यको ८३.०५ प्रतिशत हो।
नेपालगन्ज भन्सार कार्यालयका प्रमुख जनार्दन पौडेलका अनुसार गत आर्थिक वर्षको जेठ मसान्तसम्म १८ अर्ब २९ करोड १२ लाख १२ हजार रुपैयाँ राजस्व संकलन भएको थियो। चालु आर्थिक वर्षको सोही अवधिमा उक्त रकम बढेर १८ अर्ब ५७ करोड ९९ लाख ५६ हजार रुपैयाँ पुगेको छ।
उनले चालु आर्थिक वर्षमा गत वर्षको तुलनामा करिब २६ करोड ५० लाख रुपैयाँ बढी राजस्व संकलन भएको बताउँदै राजस्व, आयात, निर्यात तथा समग्र वैदेशिक व्यापारका सूचकहरू सकारात्मक दिशातर्फ उन्मुख रहेको जानकारी दिए।
प्रमुख पौडेलका अनुसार लक्ष्य घटाइएको अवस्थामासमेत राजस्व असुलीमा वृद्धि हुनु कार्यालयका लागि उत्साहजनक उपलब्धि हो। तर, कुल व्यापारमा आयातको हिस्सा अत्यधिक रहेकाले उत्पादन वृद्धि, निर्यात प्रवर्द्धन र व्यापार सन्तुलन कायम गर्न निर्यात बढाउनु आवश्यक रहेको उनले बताए।
कार्यालयको मासिक विवरणअनुसार चालु आर्थिक वर्षभरि राजस्व संकलनमा केही उतारचढाव देखिए पनि अधिकांश महिनामा लक्ष्यको ८० प्रतिशतभन्दा बढी राजस्व संकलन भएको छ।
विशेषगरी चैत महिनामा लक्ष्यको ९८.३७ प्रतिशत राजस्व असुल गर्दै चालु आर्थिक वर्षकै उत्कृष्ट प्रदर्शन भएको थियो। उक्त महिनामा २ अर्ब १७ करोड ८१ लाख ९६ हजार रुपैयाँ लक्ष्य रहेकामा २ अर्ब १४ करोड २६ लाख ४७ हजार रुपैयाँ राजस्व संकलन भएको थियो।
यस्तै, फागुनमा ८८.३९ प्रतिशत, असोज र माघमा समान ८८.३२ प्रतिशत, वैशाखमा ८५.४४ प्रतिशत, मंसिरमा ८३.४५ प्रतिशत, पुसमा ८३.२९ प्रतिशत तथा जेठमा ८०.५१ प्रतिशत लक्ष्य प्राप्त भएको कार्यालयले जनाएको छ।
यद्यपि आर्थिक वर्षको सुरुआती महिनामा लक्ष्यअनुसार राजस्व संकलन हुन सकेको थिएन। साउनमा ७४.१९ प्रतिशत, कात्तिकमा ७२.३१ प्रतिशत र भदौमा सबैभन्दा कम ६९.७७ प्रतिशत मात्र लक्ष्य प्राप्त भएको तथ्यांकले देखाएको छ।
समग्रमा, लक्ष्यभन्दा कम राजस्व संकलन भए पनि गत वर्षको तुलनामा भएको वृद्धि र अधिकांश महिनामा ८० प्रतिशतभन्दा बढी लक्ष्य हासिल हुनुले नेपालगन्ज भन्सार कार्यालयको राजस्व संकलन सन्तोषजनक रहेको कार्यालयको निष्कर्ष छ।
Discussion about this post