चुलाचुली गाउँपालिकाका इन्जिनियर ६ लाख घुससहित पक्राउ

काठमाडौें, असार ३१ गते ।
इलामको चुलाचुली गाउँपालिकामा कार्यरत इन्जिनियर डिल्लीराज खड्का ६ लाख रुपैयाँ घुससहित पक्राउ परेका छन्।

अख्तियार दुरुपयोग अनुसन्धान आयोगका अनुसार खड्कालाई बुधबार झापाको दमक नगरपालिका–१ स्थित एक खाजाघरबाट सेवाग्राहीबाट लिएको ६ लाख रुपैयाँसहित पक्राउ गरिएको हो।

आयोगका प्रवक्ता सुरेश न्यौपानेका अनुसार इन्जिनियर खड्काले पुलको पुनःडिजाइन (रिडिजाइन) स्वीकृत गराइदिने तथा ठेक्काको भुक्तानी प्रक्रियामा सहजीकरण गरिदिने भन्दै सेवाग्राहीसँग घुस मागेका थिए। घुस नदिए दुःख र हैरानी दिने गरेको उजुरीपछि अख्तियारको टोलीले निगरानी बढाएको थियो।

अख्तियारले सेवाग्राहीबाट लिएको ६ लाख रुपैयाँसहित उनलाई नियन्त्रणमा लिई थप अनुसन्धान अघि बढाएको जनाएको छ।