बाँके, असार ३२ गते ।
बाँकेका तीन स्थानीय तहलाई जोड्ने उद्देश्यले राप्ती नदीको पिप्रहवा घाटमा झोलुङ्गे पुल निर्माण हुने भएको छ। पुल निर्माणको काम आर्थिक वर्ष २०८३/८४ बाट सुरु गर्ने तयारी गरिएको छ।
सस्पेन्सन ब्रिज डिभिजन कार्यालय, ललितपुरका इन्जिनियर कैलाश मोक्तानका अनुसार पुल निर्माणका लागि प्रारम्भिक सर्वेक्षण सम्पन्न भइसकेको छ भने आगामी आर्थिक वर्षको बजेटमा आवश्यक रकमसमेत विनियोजन भइसकेको छ। अब अन्तिम सर्वेक्षण सम्पन्न गरी निर्माण प्रक्रिया अघि बढाइने उनले जानकारी दिए।
उनका अनुसार हाल पुलको डिजाइन, लागत अनुमान र निर्माण मोडालिटी तय गर्ने काम भइरहेको छ। करिब १५ करोड रुपैयाँको लागतमा निर्माण हुने मल्टिस्पान सस्पेन्सन पुल ५५० मिटर लामो र दुई मिटर चौडा हुनेछ।
पुल निर्माणपछि राप्तीसोनारी गाउँपालिका–७ का फरेदा, पिप्रहवा, देउपुरुवा लगायतका बस्ती, डुडुवा गाउँपालिका–१ का बालुपुरुवा, चौफेरी तथा नरैनापुर क्षेत्रका स्थानीयलाई आवागमनमा सहज हुने अपेक्षा गरिएको छ।
यसअघि इन्जिनियर मोक्तानको नेतृत्वमा खटिएको प्राविधिक टोलीले निर्माणस्थलको स्थलगत अध्ययन गर्दै नदीको बहाव, दुवै किनारको भौगोलिक अवस्था र निर्माणयोग्य क्षेत्रको प्रारम्भिक सर्वेक्षण सम्पन्न गरेको थियो।
राप्तीसोनारी गाउँपालिका–७ का वडाध्यक्ष रामलखन थारुले पुल निर्माण भएपछि वर्षौंदेखि डुङ्गामार्फत राप्ती नदी वारपार गर्नुपर्ने बाध्यता अन्त्य हुने र राप्तीसोनारी, नरैनापुर तथा डुडुवा गाउँपालिकाका स्थानीयलाई ठूलो राहत पुग्ने बताए।
राप्तीसोनारी–७ खल्ला झगडियाका ७० वर्षीय दुर्गाप्रसाद पाण्डेले पिप्रहवा घाटमा पुल निर्माणका लागि करिब पाँच दशकदेखि माग र पहल हुँदै आएको उल्लेख गर्दै अब जोखिमपूर्ण यात्रा अन्त्य हुने विश्वास व्यक्त गरे।
पिप्रहवा घाटमा विगत १० वर्षदेखि डुङ्गा सञ्चालन गर्दै आएका माझी गुड्डु मल्लाहले बाढीका बेला डुङ्गा चलाउँदा पटक–पटक जोखिम व्यहोर्नुपरेको बताउँदै पुल निर्माणको प्रक्रिया अघि बढ्न लागेको खबरले खुसी लागेको प्रतिक्रिया दिए।
नेपाली कांग्रेस बाँके क्षेत्र नं. १ का सभापति पोषण केसीले पनि पुल निर्माणका लागि लामो समयदेखि पहल गर्दै आएको उल्लेख गर्दै अब निर्माण प्रक्रिया सुरु हुन लागेकोमा खुसी व्यक्त गरे।
स्थानीयवासीले पुल निर्माण सम्पन्न भएपछि वर्षायाममा हुने जोखिमपूर्ण यात्रा अन्त्य हुनुका साथै शिक्षा, स्वास्थ्य, कृषि उत्पादनको ढुवानी तथा दैनिक आवागमनमा उल्लेखनीय सहजता आउने विश्वास व्यक्त गरेका छन्।
Discussion about this post