बाँके, कात्तिक १९ गते ।
तिहार र छठपर्व नजिकिएसँगै भारतबाट स्वदेश फर्किने नेपालीको सङ्ख्या बढेपछि नेपाल–भारत जमुनाह नाकामा सुरक्षा व्यवस्था कडा पारिएको छ । चाडपर्वका बेला हुने भीडभाडको फाइदा उठाएर लागुऔषध तस्करी, ठगी तथा अन्य अवैध गतिविधि हुन सक्ने आशङ्कामा प्रहरीले सुरक्षा सतर्कता बढाएको हो ।
नाकामा यात्रुको चाप बढेसँगै आवागमन सहज बनाउने र अवैध गतिविधि नियन्त्रण गर्ने उद्देश्यले तालिमप्राप्त कुकुरसमेत परिचालन गरिएको जिल्ला प्रहरी कार्यालय बाँकेले जनाएको छ ।
जिल्ला प्रहरी कार्यालय बाँकेका प्रहरी प्रमुख प्रहरी उपरीक्षक अङ्गुर जिसीले चाडपर्वका बेला यात्रुको भीडको फाइदा उठाएर गैरकानुनी गतिविधि हुन सक्ने भएकाले सुरक्षा निगरानी बढाइएको बताए । उनले शङ्कास्पद गतिविधि नियन्त्रण गर्न तालिमप्राप्त कुकुर परिचालन गर्नुका साथै सुरक्षाकर्मीलाई थप सतर्क बनाइएको बताए ।
भारतबाट घर फर्किने नेपालीले विगतमा सीमावर्ती क्षेत्रमा लुटपाट, ठगीलगायतका समस्या भोग्नुपरेका घटनालाई ध्यानमा राखेर यस वर्ष नाकामा सुरक्षा व्यवस्था थप कडा पारिएको जिसीले बताए ।
प्रमुख जिल्ला अधिकारी दिलकुमार तामाङले पनि चाडपर्वका बेला नाकामा यात्रुको चाप बढ्ने भएकाले सुरक्षा व्यवस्था मजबुत बनाइएको बताए । उनले समस्यामा परेका यात्रुलाई सहजीकरण गर्ने र सीमावर्ती क्षेत्रमा हुन सक्ने लागुऔषध कारोबार नियन्त्रण गर्ने उद्देश्यले तालिमप्राप्त कुकुर परिचालन गरिएको बताए ।
प्रहरीका अनुसार अहिले सीमाबाट हुने अवैध सामानको ओसारपसार, लागुऔषध तस्करी, हातहतियारको अवैध कारोबार तथा अन्य सीमा अपराध नियन्त्रणमा विशेष निगरानी राखिएको छ । यात्रुको आवागमन सहज बनाउने, शङ्कास्पद गतिविधिमाथि निगरानी गर्ने र सुरक्षा जाँच प्रभावकारी बनाउने काम भइरहेको प्रहरीले जनाएको छ ।
तिहार र छठपर्व मनाउन भारतका विभिन्न सहरबाट नेपालीहरू स्वदेश फर्किने क्रम बढेको छ । यात्रुको सुरक्षा, ठगी तथा लुटपाट नियन्त्रण र सहज आवागमनका लागि सीमावर्ती क्षेत्रमा सुरक्षा व्यवस्था र यात्रु सहायता सेवालाई प्रभावकारी बनाइएको प्रहरीले जनाएको छ ।
Discussion about this post