खोजखबर संवाददाता
बाँके साउन १ गते । भूमि सुधार तथा मालपोत कार्यालय बाँकेमा विगतमा संकलन हुने राजश्व जोखिम मोलेर तीन किलोमिटर टाढाको राष्ट्रिय बाणिज्य बैंकमा जम्मा गरिन्थ्यो । सेवाग्राहीलाई समेत कार्यालयमा भिडभाड हुने हुँदा अस्तव्यस्त थियो । अब भने सम्पूर्ण राजश्व सम्बन्धि नगद कारोबार बुधबारदेखि बैंक मार्फत गर्न सुरु गरिएको छ । मालपोत कार्यालय नजिकै रहेको नेपाल बैंक लिमिटेड मार्फत मालपोत कार्यालयबाट हुने राजश्व सम्बन्धि नगद कारोबार तथा राजश्व संकलन सम्बन्धि सम्पूर्ण कारोबार सुरु गरिएको हो ।
मालपोत कार्यालय बाँकेका प्रमुख प्रेम दौल्यालले कार्यालयमा भईरहेको काम भन्दा सेवाग्राहीले अझ बढि सहज तरिकाले सेवा सुविधा पाउन भनेर बैंकसँग सहकार्य गरिएको बताउनुभयो ।सो अवसरमा बाँकेका प्रमुख जिल्ला अधिकारी मदन भुजेल, नेपाल राष्ट्र बैंक नेपालगञ्जका निर्देशक मुक्तिनाथ सापकोटा, आन्तरिक राजश्व कार्यालयका प्रमुख प्रकाश पौडेल, कोष तथा लेखा नियन्त्रण कार्यालयका प्रमुख रामचन्द्र शर्मा, प्रहरी उपरीक्षक वरिबहादुर वली, मव क्याम्पसका प्राध्यापक अर्जुन पोख्रेल,लगायतले सहज सेवा प्रवाहमा जोड दिनुभयो । बुधबार बैंकमा आयोजित औपचारिक कार्यक्रममा नेपाल बैंक लिमिटेडका प्रदेश प्रमुख पासाङ दोर्जे शेर्पा र सिटी अफिस नेपालगञ्जका शाखा प्रबन्धक जनकप्रसाद सुवेदीले आम नागरिकले सहज तरिकाले सेवा पाउने गरि काम सुरु गरिने बिश्वास दिलाउनुभयो ।
Discussion about this post