खोजखबर संवाददाता
बाँके साउन २ गते । शहरी विकासमन्त्री मोहम्मद इस्तियाक राईले प्रदेश सरकार र स्थानीय तहले संघीयताको अभ्यास गर्दा संविधानको गलत व्याख्या गर्न नहुने बताएका छन् ।नगरपालिका संघले बुधवार धुलिखेलमा आयोजना गरेको कार्यशाला गोष्ठीलाई सम्बोधन गर्दै मन्त्री राईले प्रदेश सरकार र स्थानीय सरकारले संघीयताको अभ्यास गर्दा आफ्नो क्षेत्राधिकारको हेक्का राख्नुपर्ने बताए । मन्त्री राईले भने, ‘गाँउ–गाँउमा सिंहदरवार पुग्यो, तर सिंहदरवारको अधिकार कतै बढी मात्रामा प्रयोग गर्दा जनताले दुःख पाउने अवस्था श्रृजना नहोस् भन्नेमा केन्द्र सरकार चिन्तित छ ।’उनले संघीयताको अधिकार मिच्ने सरकारको उद्देश्य नभएको स्पष्ट पार्दै प्रदेश र स्थानीय सरकारको अधिकारमा केन्द्र सरकारले कहिलेपनि हस्तक्षेप गर्न नचाहेको स्पष्ट पारे । केही कानूनको निर्माणपछि तीन तहको सरकारबीच अधिकार बाँडफाँडको विषय व्यवस्थित हुने भएकाले वर्तमान परिस्थितिलाई स्थानीय सरकारले बुझिदिनुपर्ने मन्त्री राईको भनाई छ ।नगरपालिकाहरूको गुरुयोजना शहरी विकास मन्त्रालयले नै बनाउने भएकाले यही मन्त्रालयलाई नै सम्पर्क मन्त्रालय बनाउनेतर्फ अग्रह हुन समेत उनले सबै स्थानीय सरकारका प्रतिनिधिलाई आग्रह गरेका छन् । नगरपालिकाहरूले बनाएको रणनीतिक कार्ययोजनालाई मन्त्रालयले आत्मसाथ गरेर आगामी दिनमा सहकार्य र समन्वय गरेर अघि बढ्ने मन्त्री राईको भनाई छ ।
Discussion about this post