खोजखबर संवाददाता
बाँके साउन ११ गते । नेपालगञ्ज उपमहानगरपालिकाले परम्परागत पेशालाई आधुनिकरण गर्न दलित तथा सिमान्तकृत समुदायका ब्यक्तिलाई उपकरण सहयोग गरेको छ । शनिबार उपमहानगरपालिकाको कार्यालयमा भएको कार्यक्रममा प्रमुख डा. धवलशम्शेर राणा, उपप्रमुख उमा थापा मगर लगायतले ति सामाग्रीहरु हस्तान्तरण गर्नुभयो । परम्परागत कपडा धुने काम गर्दै आएका धोवी समुदायका १० जनालाई वासिङ मेसिन, परम्परागत कपडा सिलाउने काम गर्दै आएका समुदायका १० जनालाई टेलरिङ्ग मेसिन, १० जनालाई इन्टरलक मेसिन, दुईजनालाई जुत्ता सिलाउने मेसिन उपलब्ध गराइएको छ । विभिन्न कृषि तथा सहकारी संस्थालाई पम्पसेट, पाईल लगायतका सामाग्री सहयोग गरिएको हो । लक्षित समुदायका ब्यक्तिलाई सामाग्री हस्तान्तरण गर्दै प्रमुख डा. राणाले उपमहानगरपालिकाको ध्यान अब नागरिकको आयआर्जन बढाउनेतर्फ केन्द्रीत भएको बताउनुभयो । केही दिनभित्रै नगर बस संचालन गर्न लागिएको भन्दै उहाँले प्रदेश ५ का मुख्यमन्त्रीबाट आगामी दिनमा थप बसको सहयोग गर्ने प्रतिवद्धता आएको बताउनुभयो ।
उहाँले साझेदारी विकास कार्यक्रम अन्तर्गत हालसम्म विपन्न समुदायका दुईसय महिलालाई बिना धितो ऋण सहयोग गरिएको भन्दै तीनबर्षभित्र एकहजारलाई यस्तो सहयोग दिइने बताउनुभयो । उपप्रमुख थापाले परम्परागत पेशाको स्तरउन्नतीका लागि आधुनिक उपकरण सहयोग गरिएको भन्दै यसको सहि सदुपयोगमा जोड दिनुभयो । कार्यक्रममा प्रबक्ता प्रमेदा रिजाल, वडा नम्बर २ का अध्यक्ष सुनिल सिंह हमाल, वडा नम्बर ५ का अध्यक्ष समिरप्रताप सिंह, वडा नम्बर ७ का कावा अध्यक्ष रेखा बर्मा, वडा नम्बर १४ का अध्यक्ष ओमकार मिश्रा, वडा नम्बर १७ का अध्यक्ष अजय पाठक, वडा नम्बर २३ का अध्यक्ष मो. हुसेन, कार्यपालिका सदस्य देउमल सुनार लगायतले लक्षित वर्गको कार्यक्रमबाट प्रदान गरिएको सहयोग सामाग्रीको उपयोग गरि जिविकोपार्जनमा लाभ लिन आग्रह गर्नुभयो । कार्यपालिका सदस्य कौशलकुमार धोवीले संचालन गर्नुभएको कार्यक्रमको अध्यक्षता कार्यपालिका सदस्य देवेन्द्रपाल सिंहले गर्नुभएको थियो । सोह कार्यक्रम अन्तर्गत गुरुनानक सिंह सभा गुरुद्धारा, गायत्री प्रज्ञा अभियान , कब्रस्थान सहावा, नेपाल नेत्रहिन संघ, बौद्ध गुम्वा र जय मा दुर्गेलाई वाटर कुलर सहयोग गरिएको छ ।
Discussion about this post