दाङ जेठ ३१ गते ।
दाङमा मापदण्डविपरीत खोलाहरुबाट ढुंगाजन्य बस्तुहरु उत्खनन् भइरहेका छन्। जिल्लाका विभिन्न खोला तथा नदीहरुमा उत्खनन् क्षेत्रमा चार किल्ला समेत निर्धारण नगरी हचुवाका भरमा ढुंगाजन्य वस्तु उत्खनन गरिरहेका छन्।
जिल्ला समन्वय समितिले घोराहीमा पत्रकार सम्मेलन गरी खोला तथा नदीबाट उत्खनन् भएका ढुंगाजन्य बस्तुहरु निर्माण कार्यमा नभई क्रसर उद्योगमा लगेको फेला परेको जनाएको छ। समितिका उपप्रमुख श्रीधर शर्मा पौडेलले तुलसीपुर उपमहानगरपालिका, लमही नगरपालिका, बबई, दंगीशरण, राप्ती र गढवा गाउँपालिकाका विभिन्न खोलामा अवैध उत्खनन, निकासी र मनपरी मेसिनरी यन्त्रहरुको प्रयोग भएको जानकारी दिए।
त्यसैगरी घोराही तुलसीपुर फोरलेन सडकमा प्रयोग हुने ग्राभेल ग्वारखोलाबाट उत्खनन् गरी सम्बन्धित निर्माण कार्यमा प्रयोग नगरी क्रसर उद्योगमा लगेको र वातावरणीय प्रभाव मूल्याङकन नगरिएको क्षेत्रबाट उत्खनन् गरेको पाइएको उनले बताए।
साथै ढुंगाजन्य वस्तुको उत्खनन् र निकासीका लागि स्थानीय तहलाई जिम्मा दिए पनि अपेक्षाअनुसार काम गर्न नसकेको अनुगमनबाट फेला परेको समितिले जनाएको छ। विकास निर्माणको काम भनेर अनुमति लिने तर क्रसर उद्योगमा पु¥याउने र जथाभावी खोला खन्ने गरेको उपप्रमुख पौडेलले बताए।
यसैबीच समितिले आगामी असार १ देखि असोज १ गतेसम्म जिल्लामा नदीजन्य पदार्थ उत्खनन र निकासी पूर्ण रोक लगाइएको पत्रकार सम्मेलनमा जानकारी दिएको छ।
Discussion about this post