सरला सुबेदी
बाँके असार ७ गते ।
राम जानकी मावि कोहलपुरले अनलाइन कक्षा सुरुवात गर्न विद्यार्थी तथा अभिभावकहरुका लागि अभिमुखीकरण कार्यक्रम सम्पन्न गरेको छ।
विद्यालयले नेपाल सरकार शिक्षा, विज्ञान तथा प्रविधी मन्त्रालयद्वारा जारी वैकल्पिक प्रणालीबाट विद्यार्थीको सिकाइ सहजीकरण निर्देशिका, २०७७ अनुसार वैकल्पिक तथा अनलाइन माध्यमबाट कक्षाहरु सुचारु गर्न अभिभावकहरूलाई सो बारेमा जानकारी गराउने उद्देश्यका साथ भौतिक दुरी कायम गरी उक्त अभिमुखीकरण कार्यक्रम आयोजना गरेको हो।
कार्यक्रमको शुरुवातमा विद्यालयका शिक्षक मेघनाथ घिमिरेले असार ८ गतेदेखि कक्षा १० का विद्यार्थीहरुलाई नियमितरुपमा विभिन्न विधिबाट सिकाइमा सहजीकरण गर्न लागिएको जानकारी दिएका छन् ।
यस्तो विषम परिस्थितिमा पनि विद्यार्थीहरूको सिकाइलाई केन्द्रमा राखी विद्यालयले अनलाइन कक्षा सुरु गर्न लागेकोले आफूहरु अत्यन्त खुशी भएको र यसका लागि आवश्यक सहयोग गर्ने कुरा अभिभावक दिलमाया सारु ले बताइन्।
विद्यालयले सुरुवातको चरणमा कक्षा १० बाट अनलाइन कक्षा संचालन गर्न लागेको, साथै आगामी दिनहरुमा अन्य कक्षा हरुमा पनि यसलाई विस्तार गर्दै लैजाने, विद्यालयका व्यवस्थापकीय निर्देशक दिनेश सिग्देलले बताए।
बन्दा बन्दीको समयमा विद्यार्थीहरूको सिकाई गतिविधिलाई लामो समयसम्म स्थगित गर्दा विद्यार्थीहरूको सिकाइमा गतिरोध हुने साथै मानसिक रुपमा समेत नकारात्मक असर पर्नसक्ने भएकाले नेपाल सरकारको निर्णयअनुसार र अभिभावक तथा विद्यार्थीहरुसँगको छलफलपश्चात विद्यालयले मुख्य-मुख्य विषयका कक्षाहरु हाल दैनिक दुई घन्टा अनलाइन मार्फत संचालन गर्न लागिएको र सिकाइलाई प्रभावकारी बनाउन अन्य वैकल्पिक माध्यम तथा प्रविधिहरूको समेत प्रयोग गर्न लागिएको उनले प्रष्ट पारे।
उक्त कार्यक्रममा अनलाइन कक्षा के हो?, किन र कसरी सञ्चालन गर्ने? भन्ने विषयमा विस्तृत रूपमा बागेश्वरी बहुमुखी क्याम्पस कोहलपुरका शिक्षक प्रमोद सुवेदीले सहजीकरण गरेका थिए।
Discussion about this post