बाँके, असोज ७ गते ।
जनता समाजवादी पार्टी (जसपा) नेपालकी लुम्बिनी प्रदेशसभा सदस्य अम्बिका काफ्लेले आफूलाई पदमुक्त गर्ने लुम्बिनी प्रदेशसभा सभामुखको निर्णय असंवैधानिक भएको दाबी गरेकी छन् । सर्वोच्च अदालतले पदमुक्त गर्ने निर्णय तत्काल कार्यान्वयन नगर्न अल्पकालीन अन्तरिम आदेश दिएपछि बुधबार नेपालगन्जमा पत्रकार सम्मेलन गर्दै काफ्लेले यस्तो बताएकी हुन् ।
काफ्लेले आफूलाई पदमुक्त गर्न कीर्ते कागज तयार पारिएको र त्यही कागजका आधारमा सभामुखले निर्णय गरेको आरोप लगाइन् । उनले एमाले–माओवादी नेतृत्वको सरकार टिकाउने उद्देश्यले आफूलाई पदमुक्त गर्ने प्रक्रिया अघि बढाइएको दाबीसमेत गरिन् ।
‘सभामुखले समेत कीर्ते कागजका आधारमा मलाई पदमुक्त गर्ने निर्णय गर्नुभयो । त्यो निर्णय असंवैधानिक थियो भन्ने कुरा सर्वोच्च अदालतको आदेशले पुष्टि गरेको छ,’ उनले भनिन् ।
उनका अनुसार आफूलाई पदमुक्त गर्नुअघि अपनाइएको प्रक्रिया नै त्रुटिपूर्ण थियो । आफू जसपा नेपालको साधारण सदस्यसमेत नरहेको व्यक्तिको सिफारिसका आधारमा कारबाही गरिएको भन्दै उनले त्यसप्रति आपत्ति जनाइन् ।
सर्वोच्च अदालतका न्यायाधीश कुमार रेग्मीको एकल इजलासले मंगलबार काफ्लेलाई पदमुक्त गर्ने प्रदेशसभा सचिवालयको निर्णय तत्काल कार्यान्वयन नगर्न अल्पकालीन अन्तरिम आदेश दिएको थियो ।
अदालतले अन्तरिम आदेशलाई निरन्तरता दिने वा नदिने विषयमा छलफल गर्न दुवै पक्षलाई बोलाएको छ । त्यसका लागि आगामी असोज १६ गते पेसी तोकिएको छ ।
यता, प्रदेशसभा सचिवालयले भने जसपा नेपालबाट प्राप्त पत्रका आधारमा राजनीतिक दलसम्बन्धी ऐन, २०७३ र लुम्बिनी प्रदेशसभा नियमावली, २०७९ अनुसार काफ्लेको दल त्यागसम्बन्धी सूचना प्रकाशन गरिएको जनाएको छ । सभामुख तुलाराम घर्तीको निर्देशनअनुसार प्रदेशसभा अधिवेशन चालु नरहेको अवस्थामा सूचना जारी गरिएको सचिवालयको भनाइ छ ।
काफ्लेले आफू लुम्बिनी प्रदेशभर जसपा नेपालले प्राप्त गरेको मतका आधारमा समानुपातिक प्रदेशसभा सदस्य बनेको बताइन् । उनले आफूलाई निर्वाचित गराउन भूमिका खेल्ने पार्टीका नेता तथा कार्यकर्ताप्रति आभार व्यक्त गरिन् ।
सर्वोच्च अदालतको आदेशले आफूले न्याय पाउने बाटो खुलेको उनको भनाइ छ । आगामी दिनमा महिला तथा पछाडि पारिएका समुदायको उत्थानका लागि काम गर्ने उनले बताइन् ।
आफ्नो आगामी राजनीतिक यात्राबारे पत्रकारले राखेको जिज्ञासामा काफ्लेले आफू अझै पनि जसपा नेपालकै नेता रहेको स्पष्ट पारिन् ।
‘म जसपा नेपालकै नेता हुँ । सरकारलाई स्थायित्व दिनुपर्छ भन्ने मेरो मान्यता हो,’ उनले भनिन्, ‘पार्टीको लाइनभन्दा बाहिर जाने छैन ।’ काफ्लेले जिल्ला तथा केन्द्रीय नेतृत्वलाई सँगै राखेर पत्रकार सम्मेलनमार्फत आफ्नो धारणा सार्वजनिक गरेकी हुन् ।
Discussion about this post