बाँके, असोज ७ गते ।
सम्भावित भारी वर्षा र मनसुनजन्य विपद्को जोखिमलाई ध्यानमा राख्दै बाँके प्रशासनले विपद् न्यूनीकरण, प्रतिकार्य तथा उद्धारको पूर्वतयारीलाई तीव्र पारेको छ।
जल तथा मौसम विज्ञान विभागको मौसम पूर्वानुमान महाशाखाले असोज ८ देखि १२ गतेसम्म भारी वर्षाको सम्भावना औँल्याएपछि जिल्ला प्रशासन कार्यालय बाँके र सुरक्षा निकायले विपद् व्यवस्थापनको तयारी अघि बढाएका हुन्।
जिल्लामा सम्भावित जोखिम न्यूनीकरणका लागि सरकारी कार्यालयका प्रमुख तथा सरोकारवाला निकायसँग समन्वय गरी पूर्वतयारी थालिएको बाँकेका प्रमुख जिल्ला अधिकारी दीलकुमार तामाङले बताए।
उनका अनुसार नेपाली सेना, नेपाल प्रहरी र सशस्त्र प्रहरी बलका कमान्ड पोस्टलाई तयारी अवस्थामा रहन निर्देशन दिइएको छ। सम्भावित विपद्का घटनामा तत्काल प्रतिकार्य र उद्धार गर्न जनशक्ति तथा आवश्यक स्रोतसाधन तयारी अवस्थामा राखिएको उनले बताए।
‘सम्भावित जोखिमयुक्त क्षेत्र, विशेषगरी विगतमा बाढी र डुबान हुने स्थानको पहिचान गरी जोखिम न्यूनीकरणका लागि आवश्यक तयारी गरेका छौं,’ उनले भने, ‘जोखिमयुक्त क्षेत्रका बासिन्दालाई पूर्वसूचनामार्फत सचेत गराउने काम पनि भइरहेको छ।’
जिल्ला प्रशासन कार्यालयले विपद्सँग सम्बन्धित सरकारी कार्यालय तथा संस्थाका विपद् फोकल पर्सनसँग छलफल गरी सम्भावित जोखिम र प्रतिकार्य योजनाबारे आवश्यक समन्वय गरिरहेको तामाङले बताए।
जिल्ला विपद् व्यवस्थापन समितिले पनि मनसुनजन्य विपद्बाट हुन सक्ने क्षति न्यूनीकरणका लागि जिल्लाका सबै स्थानीय तह र सुरक्षा निकायलाई तयारी अवस्थामा रहन निर्देशन दिएको छ।
प्रमुख जिल्ला अधिकारी तामाङका अनुसार मौसम पूर्वानुमानलाई आधार बनाएर जिल्लाका आठवटै स्थानीय तहलाई पूर्वतयारी र आवश्यक स्रोतसाधन व्यवस्थापन गर्न सूचित गरिएको छ। जोखिमयुक्त बस्ती तथा क्षेत्रमा आवश्यक सतर्कता अपनाउन र विपद् आइपरे तत्काल प्रतिकार्य गर्न स्थानीय तहलाई आग्रह गरिएको उनले बताए।
यसैबीच, जिल्लास्थित सुरक्षा निकायले विपद् व्यवस्थापनका लागि आवश्यक जनशक्ति तयारी अवस्थामा राखिएको जनाएका छन्। बाढी, डुबानलगायतका सम्भावित घटनामा उद्धार तथा राहत कार्यलाई प्रभावकारी बनाउन आवश्यक उपकरण, स्रोतसाधन र जनशक्ति परिचालनका लागि तयारी गरिएको सुरक्षा निकायले बताएका छन्।
उद्धार तथा राहत कार्यलाई प्रभावकारी बनाउन आवश्यक स्रोतसाधन उपलब्ध गराउन सुरक्षा निकायले सम्बन्धित निकाय तथा स्थानीय तहसँग आग्रह गरेका छन्।
Discussion about this post