जावेद अन्सारी
बाँके भदौ ५ गते । प्रदेश ५ सरकारले तयार गरिरहेको स्वास्थ्य नितिका बारेमा विहिबार नेपालगन्जमा एक छलफल तथा परामर्श कार्यक्रमको आयोजना गरिएको छ । प्रदेश ५ को सामाजिक विकास मन्त्रालयले आयोजना गरेको सो छलफल तथा परामर्श कार्यक्रममा प्रदेश सरकारले तयार गरेको स्वास्थ्य निति २०७६ को बारेमा गहन छलफल गरिनुका साथै सुझाव समेत संकलन गरियो ।
कार्यक्रममा स्वास्थ्य निर्देशनालय प्रदेश ५ का निर्देशक डा. विनोद कुमार गिरीले स्वास्थ्य निति २०७६ को मस्यौदा प्रस्तुत गरेका थिए । सो मस्यौदामाथि सहभागिहरुले छलफल गर्नुका साथै आ आफ्ना सुझाव समेत दिएका थिए । कार्यक्रमका प्रमुख अतिथि प्रदेश सरकारका सामाजिक विकास मन्त्री सदुर्शन बराल थिए । उनले सो अवसरमा प्रदेशका जनताले सर्वसुलभ तरिकाले राम्रो र स्तरीय तथा निशुल्क स्वास्थ्य सेवा पाउन् र कोही पनि सेवाबाट बन्चित हुनु नपरोस भनेर काम गरिरहेको बताए । कार्यक्रममा आएका सुझावलाई समेटेर निति तयार गर्न उनले सो अवसरमा निर्देशन समेत दिए ।
सो कार्यक्रममा सामाजिक विकास मन्त्रालयका सचिव कृष्ण प्रसाद ज्ञवाली, प्रदेश स्वास्थ्य आपूर्ति व्यवस्थापन केन्द्रका निर्देशक दिनेश कुमार चापागाई, जिल्ला समन्वय समिति बाँकेका प्रमुख अजय श्रीवास्तव, जिल्ला समन्वय समिति बर्दियाका प्रमुख शंकर प्रसाद थारु, नेपालगञ्ज उपमहानगरका उपप्रमुख उमा थापामगरले पनि स्वास्थ्य नितिका बारेमा आफ्नो सुझाव दिएका थिए ।
कार्यक्रममा बाँके, बर्दिया, दांग, रोल्पा, प्यूठान र रुकुमका स्वास्थ्य कार्यालयका प्रमुख, जिल्ला समन्वय समितिका प्रमुख, स्थानीय तहका प्रमुख र उपप्रमुख, अन्तराष्टिय गैर सरकारी संस्थाका प्रमुखहरु लगायत ४० जनाको सहभागिता रहेको थियो ।
Discussion about this post