खोजखबर संवाददाता
बाँके भदौं ५ गते । बागेश्वरी मन्दिर परिसरमा कम्प्लेक्स निर्माणको लागि भनी नेपालगन्ज उपमहानगरपालिकाका मेयर एवम् बागेश्वरी मन्दिर गुठी व्यवस्थापन समितिका अध्यक्ष डा। धवल सम्सेर राणाले शिलान्यास गरेको तस्बिर फेसबुकमा पोस्ट गरेपश्चात चर्किएको विवादको क्रममा बिहिबार बागेश्वरी मन्दिरमा खुला छलफल भएको छ ।
खुला छलफलमा बाँके क्षेत्र नम्बर २ क का विधायक विजय बहादुर यादवले गुठी समितिले एकल निर्णयबाट कुनै पनि हालतमा भवन निर्माण गर्न नसक्ने बताए ।
बागेश्वरी मन्दिर परिसरमा प्रदेश नं। ५ क विधायक यादव, गुठीका सचिव गोपाल अधिकारी र अभियन्ता हेमन्त राज काफ्ले बिच गरिएको खुला छलफल र बहसमा विधायक यादवले गुठी समितिले पुरातत्व विभागबाट पुर्व स्वीकृति लिएर मात्र कार्य गर्नु पर्नेमा सो नगरेकोले गुठी नै ‘गलत ठाउँमा उभिएको जनाए ।
उनले थपे– ‘बागेश्वरी मन्दिर परिसरमा कम्प्लेक्स लगायतका निर्माणको विषयमा अब देशव्यापी रुपमा कुरा उठीसकेको छ । सहरी विकास मन्त्रालय हुँदै गृह मन्त्रालय र पुरातत्व विभागसम्म कुरा पगिसकेको छ । अब माथिल्लो निकायले छानबिन गरी आवश्यक कदम चाल्ने छ । यहाँ कसैले केही भनेर वा निर्णय गरेर केही हुने वाला छैन ।’
बागेश्वरी मन्दिर परिसरमा कम्प्लेक्स लगायत कुनै निर्माण गर्न नहुने भन्दै करिब ७ हजारभन्दा बढी जनताले आफुलाई भेटेर, फोनबाट खबर गरेर रोक्न आग्रह गरेको पनि उनले बताए । जनताको भावनाको कदर गरेर मात्र काम गर्नु पर्ने विधायक यादवले बताए ।
यसैगरी बागेश्वरी मन्दिर परिसरमा कहिले कम्प्लेक्स, कहिले अढाई तल्ला भवन लगायत पुजारीको लागि बासस्थान निर्माण गरिने भन्दै आएको गुठीका सचिव गोपाल अधिकारीले नक्सा देखाउँदै १७ वटा सटर मात्र बनाउन खोजेको बताए ।
बागेश्वरी मन्दिर परिसरमा कुनै कम्प्लेक्स निर्माण हुन नलागेको जनाउँदै सचिव अधिकारीले१७ वटा सटर मात्र निर्माण गरिने र त्यसको ठेक्का भइसकेकोले अब केही हप्तामा सटर निर्माण कार्य शुरु हुने बताए ।
गुठी समितिका सचिव अधिकारी बोलिरहेकोे बहसमा एक जना स्थानियले तातिंदै भने –‘बागेश्वरी मन्दिरको रंगरोगन गर्नु परे भक्तजनबाट हुने गर्छ । कुनै पनि कार्य हुन्छ भने सबै भक्तजनबाट नै हुन्छ भने गुठी समितिको कुनै काम नै छैन । सटर बनाएर भाडा उठाएर खाने मात्र गुठी चाहिंदैन ।
यसैगरी बागेश्वरी मन्दिर परिसरमा कुनै पनि हालतमा सटर निर्माण हुन नहुने भन्दै सहरी विकास मन्त्रीलाई दिइएको निवेदनमा हस्ताक्षर गर्ने मध्येका एक सामाजिक अभियन्ता हेमन्त राज काफ्लेले चर्को विरोध गर्दै भने–‘दिनानुदिन जनसंख्या बढ्दो रहनुको साथै भोलिका दिनमा बागेश्वरी मन्दिर परिसर पनि सानो हुन्छ । यस्तोमा सटर निर्माण गरेर भएको जग्गालाई सानो बनाउनु भन्दा खुला राखेर पर्खाल निर्माण गरेर बस्ने बेन्च राख्नु पर्छ । यो परिसरमा सटर निर्माण भन्दा जनताको भावनाको कदर गर्दै हरियो वातावरण निर्माण गर्नु पर्छ । पुरानो सटर लिएकाहरुलाई नेपालगन्ज उपमहानगरपालिकाले अन्यत्र व्यवस्था मिलाई सहयोग गर्नुपर्ने पनि उनले सुझाव दिए ।
Discussion about this post