काठमाडौं असार २८ गते ।
राष्ट्रिय जनमोर्चाले भारतीय न्यूज च्यानलहरु केवल सञ्चालकहरुले बन्द गरेकोप्रति खुसी व्यक्त गर्दै यसलाई देश भक्तिपूर्ण कदम भनेको छ ।अध्यक्ष चित्रबहादुर केसीले शनिबार एक विज्ञप्ती जारी गर्दै भारतीय सञ्चार माध्यमहरूले नेपालका प्रधानमन्त्री केपी ओली र नेपाल सरकारका विरुद्ध तथ्यहीन, भ्रामक र अनर्गल प्रचारको अभियान नै चलाएको बताएका छन् ।
उनले भ्रामक समाचारले नेपालको स्वतन्त्रता, सार्वभौमिकता र स्वाभिमानमा समेत आँच पुर्याएको उल्लेख गर्दै छिमेकी मित्र देश चीनसँगको नेपालको सम्बन्धका बारेमा तथ्यहीन समाचार सम्प्रेषण गरिनु दुर्भाग्यपूर्ण भएको बताएका छन् । भारतीय मिडियाहरूको निम्न स्तर वा पीत पत्रकारिता यसपटक छर्लङ्ग भएको उल्लेख गर्दै भारतीय मिडियाका कारण दुई देश बीचको सम्बन्धमा थप नकारात्मक प्रभाव पारेको निष्कर्ष समेत जनमोर्चाले निकालेको छ ।
यसैगरी विज्ञप्तीमा यही असार २५ र २६ गते भारी वर्षाका कारणले बाढी र पहिरोमा परी म्याग्दी, कास्की, सिन्धुपाल्चोक, गुल्मी, जाजरकोट लगायतका जिल्लाहरूमा ठूलो जन, धनको क्षति भएकोप्रति दुःख व्यक्त गर्दै तत्काल उद्दार गर्न र राहतको व्यवस्था गर्न सरकारसँग माग गरिएको छ ।
विज्ञप्तीमा अगाडि भनिएको छ ‘अहिले कोशी र नारायणी नदीमा पानीको वहाव खतराको विन्दु भन्दामाथि पुगेको छ, ठूलो वर्षा अझै जारी छ, कोशी ब्यारेजको संरचना भारतीय पक्षको अधीनमा छ ।कोशी ब्यारेजका ५६ वटा ढोकाहरूमध्ये ३३ वटा ढोकाहरू मात्र खोलिएको स्थिति छ र त्यहाँ कैयन् बस्ती डुबानमा पर्ने गम्भीर खतरा छ ।
नारायणी नदी किनार र भैसालोटनको पश्चिमतर्फका बस्ती र खेतीपातीमा ठुलो नोक्सान हुने स्थिति छ ।’भारतले अन्तर्राष्ट्रिय सीमा सम्बन्धी प्रोटोकलको उल्लङ्घन गर्दै नेपालको सिमाना नजिकै निर्माण गरेका बाटो, बाँध आदिले पनि वर्षेनी नेपालतर्फको जमिन ढुबानमा पर्ने उल्लेख गर्दै यसतर्फ सरकारको गम्भीर ध्यानाकर्षण हुनुपर्ने पनि विज्ञप्तीमा जनाइएको छ ।
Discussion about this post