बाँके वैशाख ३० गते ।
बाँके युनेस्को क्लबले बर्दियास्थित नेपाल–भारत सीमा क्षेत्रमा कार्यरत सरोकारवालाका लागि दुई दिने “क्रस–बोर्डर मेकानिज्म” सम्बन्धी तालिम सम्पन्न गरेको छ ।
क्लबले प्लान इन्टरनेशनल नेपालको साझेदारीमा सञ्चालन गरिरहेको सुरक्षा परियोजनाअन्तर्गत तालिम आयोजना गरिएको जनाएको छ ।
मानव बेचबिखन तथा ओसारपसार न्यूनीकरण, पीडित संरक्षण, सुरक्षित आप्रवासन प्रवर्द्धन तथा बाल संरक्षण अभ्यासलाई प्रभावकारी बनाउन स्थानीय सरकार, सुरक्षा निकाय, न्यायिक क्षेत्र, गैरसरकारी संस्था र सामुदायिक संरचनाबीच समन्वय तथा प्रतिकार्य प्रणाली सुदृढ गर्ने उद्देश्यले तालिम सञ्चालन गरिएको क्लबले जनाएको हो ।
तेज बहादुर भाटको अध्यक्षतामा सम्पन्न कार्यक्रममा नगर प्रमुख, उपप्रमुख, वडा अध्यक्ष, विषयगत शाखाका प्रमुख, एलसीसीएचटी सदस्य, नेपाल प्रहरी, सशस्त्र प्रहरी बल (एपीएफ) तथा विभिन्न गैरसरकारी संस्थाका प्रतिनिधिसहित २८ जनाको सहभागिता रहेको थियो ।
समापन सत्रमा नगर प्रमुख भाटले मानव बेचबिखनका बढ्दो चुनौतीप्रति गम्भीर चिन्ता व्यक्त गर्दै समन्वयात्मक पहल, जनचेतनामूलक अभियान तथा स्थानीय संयन्त्रको प्रभावकारी कार्यान्वयनमार्फत मानव बेचबिखन नियन्त्रणमा नगरपालिका प्रतिबद्ध रहेको बताए ।
उपप्रमुख अनिता चौधरीले मानव बेचबिखन गम्भीर सामाजिक समस्या भएकाले यसको नियन्त्रणका लागि सबै क्षेत्रको साझा जिम्मेवारी र सक्रिय सहभागिता आवश्यक रहेको बताइन् । उनले महिला, किशोरी तथा जोखिममा रहेका समुदायलाई चेतना, शिक्षा र जीविकोपार्जनका अवसरमार्फत सशक्त बनाउनुपर्नेमा जोड दिँदै नगरपालिकाका नीति तथा कार्यक्रममा संरक्षणसम्बन्धी विषयलाई प्राथमिकता दिइने जानकारी दिइन् ।
त्यसैगरी वडा अध्यक्ष दिलिप गुरुङले समुदायस्तरमा सचेतनामूलक कार्यक्रम सञ्चालन गर्दै प्रारम्भिक जोखिम पहिचान तथा रोकथामका लागि वडा तहको समन्वय सुदृढ गरिने बताए । उनले विद्यालय, युवा समूह, स्थानीय प्रतिनिधि तथा समुदायबीच सहकार्य बढाएर सुरक्षित समाज निर्माण गर्नुपर्नेमा जोड दिए ।
तालिममा केशव कोइरालाले सहजीकरण गरेका थिए भने महिला तथा बालबालिका शाखाकी शोभा शर्माले कार्यक्रम सञ्चालन गरेकी थिइन् । सो अवसरमा बाँके युनेस्को क्लबका परियोजना संयोजक ईश्वर बीकेले सुरक्षा परियोजनाको उद्देश्य तथा समग्र गतिविधिबारे जानकारी गराएका थिए । कार्यक्रममा फिल्ड सुपरभाइजर सबित्रा भाटले व्यवस्थापनमा सहयोग गरेकी थिइन् ।
बाँके युनेस्को क्लबका अनुसार तालिमबाट वडा तथा समुदायस्तरमा मानव बेचबिखनविरुद्ध सचेतनामूलक अभियान सञ्चालन गर्ने, स्थानीय सरकार, प्रहरी, सीमा सरोकारवाला तथा गैरसरकारी संस्थाबीच समन्वय सुदृढ गर्ने, एलसीसीएचटी संयन्त्रलाई पुनःसक्रिय र नियमित परिचालन गर्ने, विद्यालय तथा युवाकेन्द्रित सचेतनामूलक कार्यक्रम सञ्चालन गर्ने, बेचबिखन घटनामा द्रुत प्रतिकार्य तथा रिपोर्टिङ प्रणाली विकास गर्ने र पीडितमैत्री संरक्षण, सहयोग तथा सन्दर्भ प्रणाली सुनिश्चित गर्ने लगायतका कार्ययोजना तयार पारिएको जनाइएको छ ।
Discussion about this post