बाँके असोज १६ गते ।
लागु पदार्थ दुव्र्यसनी नियन्त्रण र रोकथामका लागि सबैको समन्वयकारी भूमिका हुनुपर्नेमा नेपालगन्जमा आयोजित एक कार्यक्रमका सहभागीहरुले जोड दिएका छन् ।
जिल्ला प्रहरी कार्यालय बाँकेको आयोजना, नेपालगन्ज उपमहानगरपालिका वडा नं.८ को सहयोग तथा वडा प्रहरी कार्यालय बाँकेको समन्वयमा भएको कार्यक्रममा बोल्ने सहभागीहरुले भुसको आगो झै समुदायस्तरमा लागु पदार्थ दुव्र्यसनी फैलिरहेको भन्दै रोकथाम तथा नियन्त्रणका लागि सबैको समन्वयकारी भूमिका हुनुपर्नेमा जोड दिइएको हो ।
प्रहरीको लागु औषध दुव्र्यसन निष्तेज अभियान कार्यक्रमलाई सम्वोधन गर्दै नेपालगन्ज उपमहानगरपालिका ८ का वडाअध्यक्ष सुरेन्द्र बैश्यले लागु औषध नियन्त्रणका लागि वडा कार्यालयबाट हुने सहयोग पूर्णरुपमा हुने बताउनुभयो । वडालाई लागु पदार्थ दुव्र्यसनीबाट मुक्त गराउन आफ्नोतर्फ बाट सहयोगको प्रतिबद्धता जनाउनुभयो ।
अहिले पनि दुव्र्यसनीको संख्या धेरै रहेकाले त्यसलाई सुधारको बाटोमा ल्याउन उहाँले प्रहरी, अभिभावक सबैसँग आग्रह गर्नुभयो ।
जिल्ला प्रहरी कार्यालयका प्रहरी निरीक्षक सुरज खत्रीले खुला सीमानाका कारण बाँकेमा लागु औषधका मुद्धाहरु प्रहरीमाझ धेरै पुगेको बताउनुभयो ।
अपराधका घटनामा अधिकांश लागु औषध कारोवार, प्रयोगकर्ता नै रहेको उहाँको भनाइ छ ।
उहाँले लागु औषधकै कारण समाजमा अपराधका घटना बढेको भन्दै अभिभावकहरुलाई आफ्ना छोराछोरीमाथि निगरानी बढाउन सुझाव दिनुभयो । वडा प्रहरी कार्यालयका इन्चार्ज डिल्ली बहादुर खड्काले लागु औषध रोकथाम, नियन्त्रण र निदानका लागि प्रहरीले कुनै कसर बाँकी नराख्ने बताउनुभयो ।
उहाँले भारतसँगको खुला सीमानाका कारण नेपालगन्ज लागु औषध कारोवारीको प्रमुखस्थल बनेको भन्दै यस्लाई नियन्त्रण गर्न नागरिकहरुको सहयोग जरुरी रहेको उहाँको भनाइ छ ।
बाँकेमा लागु औषध रोकथाम तथा नियन्त्रणका लागि प्रहरी, स्थानीय संघसंस्थाहरु क्रियाशील भएपनि नियन्त्रणमा आउन सकेको छैन् । भारतसँगको खुला सीमानाकाका कारण लागु पदार्थको सहज आयात हुँदा जोखिम बढेको हो ।
Discussion about this post