बाँके कार्तिक १९ गते ।
बाँकेका स्थानीय तहले विद्युत प्राधिकरणलाई करिब १७ करोड बक्यौता तिर्नपर्ने देखिएको छ । त्यसमा नेपालगञ्ज उपमहानगरपालिकाको मात्रै ११ करोड बढी बक्योता देखिएको छ ।
बाँकेमा आठवटै स्थानीय तह र केही सरकारी निकायले नियमति रूपमा बिजुलीको बक्यौता तिरेका छैनन् । उपमहानगरले नेपाल विद्युत् प्राधिकरण, नेपालगञ्ज वितरण केन्द्रलाई ११ करोड बढी महसुल तिर्न बाँकी रहेको नेपाल विद्युत् प्राधिकरण, नेपालगञ्ज वितरण केन्द्रका प्रमुख लखनलला मल्लिक बताउँछन् ।
यो बक्यौता एक दशकभन्दा बढी अवधिको हो । आफूले विद्युत् प्राधिकरणलाई महसुल नतिरे पनि नेपालगञ्ज उपमहानगरले नगरवासीबाट भने पछिल्लो समयमा वर्षेनि ११ करोडभन्दा बढी कर संकलन गर्दै आएको उपमहानगरपालिकाको राजश्व शाखाको रेकर्डले देखाएको छ ।
बाँकेकै कोहलपुर नगरपालिका, बैजनाथ र राप्तीसोनारी गाउँपालिका वडा नम्बर २, ८, ९ अनि जानकी गाउँपालिकाको वडा नम्बर ५ र ६ ले पनि बिजुलीको बिल तिर्न आनाकानी गरेका छन् । नेपालगञ्ज उपमहानगरपालिकाको वडा नम्बर २० ले पनि बिजुलीको बिल तिर्न अटेर गरेको छ ।
प्राधिकरणको, कोहलपुर वितरण केन्द्रका प्रमुख रुमेश रूपाखेती भन्छन्, “यी ठाउँका सडक बत्ती, सिंचाइ, उद्योग तथा सरकारी र गैरसरकारी कार्यालयको बक्यौता रकम ५ करोड १२ लाख ५ हजार छ । जति ताकेता गर्दा पनि उठाउन सकिएको छैन ।
”नेपालगञ्ज उपमहानगर लगायतका केही निकायसँग विद्युत् महसुल उठाउन कठिन भएको नेपाल विद्युत् प्राधिकरण, नेपालगञ्ज वितरण केन्द्रका प्रमुख लखनलला मल्लिक बताउँछन् ।
मल्लिकका अनुसार बिजुलीको बिल भुक्तानी गर्न प्राधिकरणले पटक–पटक ताकेता गर्दा पनि यी निकायले बेवास्ता गर्दै आएका छन् ।
Discussion about this post