बाँके माघ २८ गते ।
बाँके प्रहरीले मोटरसाइकल चोरीमा संलग्न ठूलो गिरोहलाई पक्राउ गर्न सफल भएको छ। नेपालगन्जका विभिन्न स्थानमा पार्किङ गरि राखिएका मोटरसाइकल चोरी गरेको अभियोगमा ६ जना पक्राउ परेको बाँकेका एसपी ओम रानाले जानकारी दिनु भयो।
आज नेपालगन्जमा पत्रकार सम्मेलनको आयोजना गरि पक्राउ ६ जनालाई सार्बजनिक गरिएको छ। पक्राउ पर्नेमा बाँके खजुरा ३ धनौलीका राम बहादुर थापा, जुम्ला चन्दनाथ ११ कालिखोला हाल नेपालगन्ज ४ बसपार्क बस्ने धिरेन्द्र विक्रम शाही, दाङ गढवा ४ खडकपुरका इरसाद मुसलमान, रोल्पा लुङ्री १ पाङ बस्ने छबिलाल पुन मगर, सोही स्थानका नबराज रोका र नेपालगन्ज १० बस्ने रंजित शर्मा छन।
शर्मालाई प्युठानको चेरनेटा, मगर र रोकालाई दाङको भालुवाङ, मुसलमानलाई प्युठानको दरभान, शाही र थापालाई नेपालगन्जबाट पक्राउ गरिएको एसपी रानाले बताउनु भयो। पक्राउ पर्नेहरु कोहि चालक हुन भने कोही वर्क शपका मिस्री भएको खुलेको छ। उनिहरुको साथबाट लु ३१ प २८६६, रा ४ प ४५५०, लु ४५ प ६२३३, रा ५ प ६२३३,रा ५ प ३२३ र बा ३६ प ५९४ नम्बरको मोटरसाइकल बरामद भएको छ।
उनिहरुले भिडभाड भएको स्थानमा मोटरसाइकल पार्किङ भएको देखेमा तार काटेर डाइरेक्ट स्टार्ट गराएर चोरी गर्ने गरेको बताएका छन। मोटरसाइकल चोरीमा थापा र शाहीको बढी भुमिका देखिएको छ। उनिहरुले यसरी चोरी गरेको मोटरसाइकल बाँकेको ढकेरी र शम्शेरगन्जको जङ्गलमा लुकाउने गरेको बयान प्रहरीलाई दिएका छन।
त्यहाँबाट मुसलमान र शर्माले वर्कसपसम्म पुर्याउने गरेको पाइएको छ। मगर र रोकाले बिक्री बितरण गर्ने गरेका थिए । उनिहरुले ती मोटरसाइकल रोल्पा,प्युठान, दाङ, जाजरकोट लगायतका पहाडी जिल्लामा बेच्ने गरेको खुलेको छ। प्रहरी सहायक निरीक्षक बिबेक अधिकारीको कमान्डमा खटिएको टोलिले उनिहरुलाई पक्राउ गर्न सफल भएको हो।
Discussion about this post