बाँके, असोज १२ गते ।
नेपालगन्ज पर्यटन परिषद्को प्रथम साधारण सभा तथा अधिवेशनले वरिष्ठ पर्यटन व्यवसायी केशव न्यौपानेको अध्यक्षतामा सात सदस्यीय नयाँ कार्यसमिति सर्वसम्मत चयन गरेको छ ।
परिषद्को विधान, २०८३ को नियम १६ बमोजिम नयाँ कार्यसमिति निर्विरोध चयन गरिएको निर्वाचन अधिकृत अधिवक्ता वसन्त गौतमले जानकारी दिए । उनका अनुसार अध्यक्षमा न्यौपानेसहित सबै पदमा तोकिएको संख्याअनुसार मात्रै उम्मेदवारी परेपछि सर्वसम्मत रूपमा कार्यसमिति चयन भएको हो ।
नवनिर्वाचित कार्यसमितिको उपाध्यक्षमा नाट्टा बाँकेका अध्यक्ष डिल्लीराज रेग्मी, महासचिवमा होटल व्यवसायी संघ बाँकेका अध्यक्ष भीमलाल कँडेल र कोषाध्यक्षमा एकराज पाण्डे चयन भएका छन् ।
यस्तै, सदस्यमा निशा बाग्ले, भागीराम वली र सुरजबहादुर भण्डारी चयन भएको निर्वाचन अधिकृत गौतमले बताए ।
परिषद्का नवनिर्वाचित अध्यक्ष न्यौपानेले पश्चिम नेपालमा पर्यटनको ठूलो सम्भावना रहेकाले नेपालगन्जलाई प्रमुख ट्रान्जिट बनाएर पर्यटकलाई विभिन्न गन्तव्यसम्म पु¥याउने गरी काम गर्ने बताए ।
उनले पश्चिम नेपालका तीनवटा प्रदेशमा रहेका पर्यटकीय गन्तव्यको प्रवद्र्धन गर्दै बढीभन्दा बढी पर्यटक भित्र्याउने परिषद्को मुख्य उद्देश्य रहेको बताए । ‘नेपालगन्जलाई ट्रान्जिट बनाएर पश्चिम नेपालका विभिन्न गन्तव्यमा पर्यटक पु¥याउन सकिन्छ,’ उनले भने, ‘भारतबाट मात्रै उल्लेख्य संख्यामा पर्यटक भित्र्याउन सके आर्थिक विकाससँगै रोजगारी सिर्जनामा पनि ठूलो योगदान पुग्छ ।’
परिषद्ले नेपालगन्ज तथा आसपासका पर्यटकीय क्षेत्रको प्रवद्र्धन, पर्यटन व्यवसायीबीच सहकार्य र पर्यटन क्षेत्रको विकासका लागि काम गर्ने जनाएको छ ।
पश्चिम नेपालमा पर्यटन क्षेत्रको प्रवद्र्धन, विकास तथा संरक्षण गर्नुका साथै पर्यटन व्यवसायसँग सम्बन्धित सरोकारवालाबीच सहकार्य र समन्वय गर्ने उद्देश्यले परिषद् गठन गरिएको हो ।
परिषद्मा होटल संघ नेपाल, होटल व्यवसायी संघ बाँके र नेपाल एसोसिएसन अफ टुर एन्ड ट्राभल एजेन्ट्स (नाट्टा) बाँके च्याप्टर संस्थागत सदस्य रहने व्यवस्था गरिएको छ ।
Discussion about this post