बाँके फागुन १४ गते ।
नेपालगन्ज रंगशालामा रहेको स्विमिङ पुल प्रयोगका लागि शुल्क निर्धारण गरिएको छ । स्विमिङ पुल संचालनका लागि मापदण्ड तयार गरि मध्यपश्चिमाञ्चल क्षेत्रीय खेलकुद विकास समितिले शुल्क निर्धारण गरेको हो ।
२५ फागुनदेखि संचालन गर्र्ने तयारी गरेको समितिले सर्वसाधारणका लागि प्रति सिफ्ट दुई सय रुपैँया र विद्यार्थीका लागि प्रति सिफ्ट एक सय रुपैँया शुल्क निर्धारण गरेको मध्यपश्चिमाञ्चल क्षेत्री खेलकुद विकास समितिका प्रमुख महेश चन्दले जानकारी दिए ।
उनले मासिक, अर्ध बार्षिक र बार्षिक सदस्यता शुल्क समेत निर्धारण भएको बताए । समितिले स्पेशल र सदस्य समुहका लागि छुट्टाछुट्टै सिफ्ट बनाएको छ । स्पेशल र सदस्य समुहका लागि विहान ८–१० बजे र स्पेशल ग्रुपका लागि बेलुकी ४ः३०–६ः३० बजेको समय निर्धारण गरिएको चन्दले जानकारी दिए । ‘सदस्य समुहका लागि बेलुकी ४ः३०–७ः३० बजेसम्म निर्धारण गरिएको छ । सर्वसाधारण महिलालाई विहान ११–१ बजेको समय दिइएको छ ।
महिलाका लागि दिइएको समयमा पुरुषलाई प्रवेश गर्न दिइने छैन,’ उनले भने ।
स्विमिङ पुल संचालनका लागि प्रशिक्षक र जीवन रक्षकको ब्यवस्था गरिएको बताउँदै उनले स्विमिङ गर्नुभन्दा पहिले अनिवार्य रुपमा सावर लिनुपर्ने नियम बनाइएको बताए । उनले स्विमिङ गर्नेहरुले अनिवार्य रुपमा स्विमिङ कस्टम लगाउनु पर्ने नियम रहेको जानकारी दिए ।
स्विमिङ संचालनका लागि खेलकुद विकास समितिले आज शुक्रवारबाट परीक्षण सुरु गर्ने भएको छ । राष्ट्रिय खेलकुद परिषदका सदस्य सचिव रमेशकुमार सिलवालले २५ फागुनमा उद्घाटन गरेपछि विधिवत रुपमा संचालन गर्ने कार्यक्रम तय भएको बताउँदै उनले सम्पूर्ण तयारी पूरा भइसकेको जानकारी दिए । स्विमिङ पुल संचालन हुनै लाग्दा कोरोनाका कारण स्थगित भएको थियो ।
Discussion about this post