बाँके, असोज १२ गते ।
बर्दियाको राजापुर र गेरुवा क्षेत्रमा स्थानीय बाल अधिकार तथा संरक्षण प्रणालीलाई प्रभावकारी बनाउन स्थानीय बाल अधिकार समितिका सदस्यहरूको दुईदिने क्षमता अभिवृद्धि तालिम सम्पन्न भएको छ ।
बालबालिका, किशोरकिशोरी तथा युवाका लागि सुरक्षित भविष्य परियोजनाअन्तर्गत बाँके युनेस्को क्लब र राधाकृष्ण थारु जनसेवा केन्द्रको साझेदारी तथा प्लान इन्टरनेसनल नेपालको सहयोगमा तालिम आयोजना गरिएको हो ।
समितिका सदस्यहरूको क्षमता मूल्याङ्कनबाट पहिचान भएका कमी र स्वीकृत क्षमता अभिवृद्धि योजनाका आधारमा तालिम सञ्चालन गरिएको आयोजकले जनाएको छ । तालिममा बाल अधिकार तथा संरक्षण, स्थानीय तहमा योजना निर्माण र कार्यान्वयन, अभिलेखीकरण, अनुगमन, सिफारिस तथा अनुगमनपछिका कार्यका विषयमा प्रशिक्षण दिइएको थियो ।
राजापुर नगरपालिकाकी उपप्रमुख तथा बाल अधिकार समिति संयोजक मनकला कुमारी चौधरीले बालविवाह, लागुऔषध तथा मादक पदार्थको दुव्र्यसन, कुपोषण र विद्यालय छाड्ने समस्या बाल संरक्षणका प्रमुख चुनौती रहेको बताइन् ।
उनले बालबालिकाका लागि सुरक्षित, समावेशी र सहयोगी वातावरण बनाउन सबै सरोकारवालाबीच समन्वय र सामूहिक जिम्मेवारी आवश्यक रहेको बताइन् ।
प्रहरी नायब उपरीक्षक होमप्रकाश चौधरीले बालबालिकालाई लागुऔषध तथा अन्य हानिकारक गतिविधिबाट जोगाउन उचित हेरचाह, सकारात्मक मार्गदर्शन र समयमै संरक्षण आवश्यक रहेको बताए । जोखिममा रहेका बालबालिकाको पहिचान गरी आवश्यक सहयोग उपलब्ध गराउन स्थानीय बाल संरक्षण संयन्त्रलाई प्रभावकारी बनाउनुपर्ने उनले बताए ।
तालिमको समापन राधाकृष्ण थारु जनसेवा केन्द्रका अध्यक्ष दिनेशप्रसाद श्रेष्ठको अध्यक्षतामा भएको थियो । श्रेष्ठले स्थानीय बाल अधिकार समितिको बाल संरक्षण प्रणाली सुदृढीकरणमा महत्वपूर्ण भूमिका रहने बताए ।
समापन कार्यक्रममा उपप्रमुख चौधरीले बालबालिकामा गरिने लगानी परिवार, समुदाय र समाजको भविष्यमा गरिने दीर्घकालीन लगानी भएको बताइन् । कार्यक्रममा बाँके युनेस्को क्लबका अध्यक्ष प्रवेज अली सिद्दिकी, सल्लाहकार कमल पन्थी, सदस्य शंकरसिंह थारुसहित विभिन्न सरोकारवालाको सहभागिता थियो ।
तालिमको सहजीकरण बिनय दिल लामाले गरेका थिए । बाँके युनेस्को क्लबका संरक्षण अधिकृत विजय शर्माले तालिमको उद्देश्यबारे जानकारी दिएका थिए भने कार्यक्रमको समन्वय तथा व्यवस्थापन सञ्जिता रिजालले गरेकी थिइन् ।
तालिममा सहभागीहरूले स्थानीय बाल संरक्षण संयन्त्रलाई प्रभावकारी बनाउँदै समन्वय, सहकार्य र जवाफदेहिता बढाउने प्रतिबद्धता जनाएका छन् ।
Discussion about this post