काठमाडौं, असोज १२ गते ।
आफ्नै कार्यालयमा बिनासूचना गैरहाजिर रहेका नौ जना प्रहरी कर्मचारीलाई सात दिनभित्र स्पष्टीकरणसहित हाजिर हुन प्रहरी प्रधान कार्यालयले निर्देशन दिएको छ।
नेपाल प्रहरी प्रधान कार्यालय, नक्सालस्थित प्रहरी महानिरीक्षकको सचिवालय (कानुन तथा मानव अधिकार महाशाखा) ले सोमबार सार्वजनिक सूचना जारी गर्दै बाटोको म्यादबाहेक सात दिनभित्र सम्बन्धित कार्यालयमा हाजिर हुन भनेको हो।
गैरहाजिर रहेका प्रहरी कर्मचारीको खोजतलास गर्दा समेत सम्पर्कमा नआएको र प्रहरी नियमावली, २०७१ (संशोधनसहित) को नियम ११५ को देहाय (२) बमोजिम प्रक्रिया पूरा गरी सूचना टाँस गरिसक्दा पनि हाजिर नभएपछि सामूहिक सूचना जारी गरिएको महाशाखाले जनाएको छ।
महाशाखाले सूचना प्रकाशित भएको मितिले बाटोको म्यादबाहेक सात दिनभित्र गैरहाजिर रहनुको चित्तबुझ्दो र सन्तोषजनक कारणसहितको स्पष्टीकरण दिएर सम्बन्धित वा सूचना जारी गर्ने कार्यालयमा हाजिर हुन भनेको छ।
तोकिएको अवधिभित्र हाजिर हुन नआए प्रहरी नियमावली, २०७१ को नियम ११३ को उपनियम (१) को खण्ड (च) बमोजिमको कसुरमा नियम १०९ को देहाय (ख) (१) अनुसार सेवाबाट हटाउने कारबाही प्रक्रिया अघि बढाइने चेतावनी पनि महाशाखाले दिएको छ।
नियमावलीको अनुसूची १४ को भाग ४ को प्रयोजनका लागि गैरहाजिर प्रहरी कर्मचारीलाई यो अन्तिम सफाइको मौका दिइएको महाशाखाले जनाएको छ।
गैरहाजिर हुनेमा नेपाल प्रहरी अस्पताल महाराजगञ्जका प्राविधिक प्रहरी नायब निरीक्षक शुक्रबहादुर महतो, जिल्ला प्रहरी कार्यालय सुनसरीको उजुरी छानबिन शाखाका प्रहरी सहायक निरीक्षक खर्गबहादुर गुरुङ, प्रहरी चौकी खुम्जुङ सोलुखुम्बुका प्राविधिक प्रहरी सहायक हवल्दार रोशन राई र प्रहरी चौकी विरुवाअर्चले स्याङ्जाका प्रहरी सहायक हवल्दार सुरेश नेपाली रहेका छन्।
त्यस्तै, नेपाल प्रहरी भौतिक पूर्वाधार महाशाखा प्राविधिक गुल्म नक्सालका प्राविधिक प्रहरी जवान मोहन भण्डारी, त्रिभुवन अन्तर्राष्ट्रिय विमानस्थल सुरक्षा कार्यालयका प्रहरी जवान कल्पना रानामगर, कोशी प्रदेश प्रहरी गण विराटनगरका प्रहरी जवान राजेन्द्र विश्वकर्मा, बागमती प्रदेश प्रहरी गण हेटौँडाका प्रहरी जवान सुमन चौधरी र प्रहरी चौकी फदवामेचकुरी कपिलवस्तुका प्रहरी जवान टोपलाल चौधरी पनि लामो समयदेखि गैरहाजिर रहेको सूचनामा उल्लेख छ।
Discussion about this post