बाँके जेठ १७ गते ।
बाँकेमा निषेधाज्ञा उल्लंघन गर्ने १२ जना व्यापारीलाई प्रहरीले पक्राउ गरेको छ । जिल्ला प्रशासन कार्यालयले जारी गरेको निषेधाज्ञा विपरीत पसल व्यवसाय गर्नेलाई प्रहरीले नगरका विभिन्न ठाउँबाट पक्राउ गरेको हो ।
जिल्ला प्रहरी कार्यालय बाँकेका एसपी ओम बहादुर रानाले अनलाइन खोजखवरलाई दिएको जानकारी अनुसार स्थानीय प्रशासनले जारी गरेको समयसीमा उल्लंघन गरी बजार व्यवसाय चलाएको पाइएपछि उनीहरु कारवाहीमा परेका हुन् । निषेधाज्ञा उल्लंघन गर्ने १२ जना व्यापारीलाई प्रहरीले पाँच घण्टा हिरासतमा राखिएको थियो ।
उनीहरुलाई पहिलो पटक सम्झाएर छाडिएको वडा प्रहरी कार्यालयका इन्चार्ज डिल्ली खड्काले बताउनुभयो । सुन व्यापारीदेखि कपडा र भाडावर्तन पसलेलाई प्रहरीले पक्राउ गरेर सम्झाइ बुझाई अहिले केहीबेर अघिमात्रै छाडिएको पनि खड्काले बताउनुभयो ।
उनीहरुलाई अर्को पटक गल्ती नगर्ने सर्तमा कागज गराएर छाडिएको पनि उहाँको भनाइ छ ।
बाँकेमा कोरोना भाइरस महामारी नियन्त्रणका लागि स्थानीय प्रशासनले विगत एक महिनादेखि निषेधाज्ञा लगाउँदै आएको छ । पछिल्लो पटक आज पुनः एक साताका लागि निषेधाज्ञा थप भएको छ । भाइरस संक्रमणको चेन ब्रेक गर्न जारी निषेधाज्ञामा दैनिक उपभोग्य सामाग्री किनमेलका लागि स्थानीय प्रशासनले विहान ७ बजेदेखि ११ बजेसम्म खाद्यान्न, तरकारी तथा दुग्धजन्य पसल व्यवसाय खुल्ला गरेपनि अन्य समयमा भने बन्द गरेको छ ।
तर केही व्यापारीहरुले प्रहरीको आँखा छलेर व्यवसाय गर्दै आएका छन् । निषेधाज्ञालाई पूर्णरुपमा कार्यान्वयन गराउन पसलेहरुलाई पक्राउ गरिएको हो । प्रहरीले भोलिदेखि निषेधाज्ञा थप कडाइ हुने पनि जनाएको छ।
Discussion about this post