जावेद अन्सारी
बाँके जेठ २७ गते ।
भारतमा कोरोना भाइरस संक्रमण क्रमश घट्दै गएपछि नेपालका पहाडी क्षेत्रका नेपालीहरु रोजगारीका लागि भारत जान थालेका छन् । लुम्बिनी, कर्णाली र सुदूरपश्चिम प्रदेशका नागरिकहरु रोजगारीका लागि भारत जानेक्रम सुरु भएको हो ।
पश्चिमी नाका भएर भारत जानेको संख्या पछिल्ला केही दिन देखि बढ्न थालेको छ। नेपालगन्जको जमुनाहस्थित प्रहरी चौकीका इन्चार्ज विष्णु गिरीका अनुसार, दैनिक ३ सयको हाराहारीमा नेपालीहरु भारत गइरहेका छन् । यस्तै भारतबाट अहिले दैनिक ६ सयको हाराहारीमा नेपालीहरु जमुनाह नाका भएर फर्किरहेका छन् । ‘अहिलेसम्म भारतबाट फर्किनेको संख्या धेरै थियो, दुई दिनयता भारत जाने बढ्दै छन्’ गिरीले भन्नुभयो, ‘भारतमा कोरोना महामारी कम भएपछि फेरि नेपाली फर्किन थालेका छन् ।’ नेपालगञ्ज नाकाबाट अचेल दैनिक ५ देखि सात सयसम्म नेपाली घर फर्किरहेका छन् । दुई दिनयता ३–४ सय नेपाली भारततिर जान थालेका छन् । जमुनाहाका इन्चार्ज गिरीले भारत जानेको संख्या दैनिक बढिरहेको बताउनुभयो ।
नेपालीहरु मौसमी कामका लागि भारतका विभिन्न स्थानमा जाने गरेका छन् । यसक्षेत्रका नागरिकहरुको रोजगारीको प्रमुख गन्तव्य भनेकै भारत हो । भारतको खासगरी महाराष्ट्र, हिमाञ्चल प्रदेशमा नेपालीहरु कामको शिलशिलामा पुग्ने गरेका छन् । आयस्तर निम्न भएका ती मानिसहरु रोजीरोटीको लागि भारत पस्ने गरेका हुन् ।
भारत फर्किने नेपालीको यतिबेला नेपालगञ्जमा लाइन देखिने गरेको छ ।
कोरोना भन्दा पनि छाक टार्ने समस्याले गर्दा उनीहरु भारततिर हिँडेका छन् । भारतमा महामारी फैलिएपछि घर फर्किएका थिए । महामारी अलिकति कम हुने बित्तिकै फेरि उतै लागेका छन् ।नेपालगञ्ज नाकामा केही दिनयता भारत जानेको भिड नै देखिन्छ । प्रहरी ब्यारेल कट्न उनीहरु तछाडमछाड गर्छन् । नाकामा रहेको इलाका प्रहरी कार्यालय, जमुनाहाले इन्ट्री गरेर पठाउने परिपाटी मिलाएको छ ।
कर्णाली प्रदेशको दैलेख, जाजरकोट, रोल्पा, स्कुम, सल्यानका बढि मानिस भारतमा मौसमी कामका लागि जाने गर्दछन् । यी नेपालीहरु भारतमा महामारी फैलिएपछि र बर्खा लगाउने हिसाबले फर्केका थिए । पहाडमा जेठमै मकै छर्ने र धान रोप्ने काम सक्ने भएकाले उनीहरु फेरि मौसमी कामका लागि भारत हिँडेका हुन् । अहिले गएका नेपाली दसैँ र तिहारमा फर्किने गर्छन् ।
अनलाइन खोजखवरसँग कुरा गर्दै जमुनाह नाकाका इन्चार्ज गिरीका अनुसार, आधार कार्ड, रासन कार्ड तथा लामो समय भारतमा बसेर काम गरेका नेपालीहरुलाई जमुनाह नाकाबाट जान दिने गरिएको उहाँका भनाइ छ । भारत जाने नागरिकहरुको सहजताका लागि रुपैडियामा भारतीय ट्राभल्स एजेन्सीहरुले कार्य गर्दै आएका छन् ।
सहज गन्तव्यका लागि आउने समस्या समाधानका लागि आफुहरुसँग गुनासो नआएको उहाँको भनाइ छ । लकडाउनका कारण नाकामा ट्राभल्स बन्द छन् । जमुनाह नाकाका प्रहरी इन्चार्ज गिरी आफ्नो ज्यानको सुरक्षाको प्रवाह नगरि नाकाको व्यवस्थापनमा खटिनुभएको छ।
Discussion about this post