बाँके असार २ गते ।
कोभिड संक्रमितको उपचार भइरहेको बाँकेका अस्पतालमा ७७ प्रतिशतबढी बेडहरू खाली भएका छन् । कोभिड उपचारका लागि विभिन्न अस्पतालमा छुट्याइएका ३६१ बेडमध्ये २६४ बेड खाली भएका छन् । एक महिनाअघिसम्म कोभिड संक्रमितले बाँकेका अस्पतालहरू भरिभराउ थिए ।
अक्सिजन र बेड नपाएरै बिरामीले ज्यान गुमाउनुपरेको थियो । तर, एक महिनापछि हिंजो साँझ बाँकेका नेपालगञ्ज र कोहलपुरस्थित अस्पतालमा ८२ जना मात्र बिरामी छन् । २५ वैशाखपछि संक्रमित बिरामीको संख्या क्रमशः घट्न थालेको हो । २ सय बेड छुट्याएको भेरी अस्पतालमा ६५ बिरामी छन् ।
तिमध्ये १८ जना सिकिस्त छन् । यस्तै १ सय ३० बेड छुट्याएको मेडिकल कलेजमा १६ बिरामीको उपचार भइरहेको छ । तीमध्ये १४ जना सिकिस्त छन । त्यस्तै, शल्यक्रिया गर्नुपर्ने अवस्थाका संक्रमितका लागि १६ बेड छुट्याएको वेष्टर्न हस्पिटलमा एक जना मात्र बिरामी छन् । यस्तै युनाइटेडका १५ बेडमध्ये सबै खाली छन् ।
स्थानीय तहले खोलेका १६ आइसोलेसन केन्द्रमध्ये चार वटामा १६ सामान्य अवस्थाका संक्रमित छन् । १२ आइसोलेसन केन्द्र खाली रहेको जिल्ला कोभिड व्यवस्थापन समितिका फोकलपर्सन तेज वलीले जानकारी दिनुभयो ।
जिल्लामा अहिले संक्रमित दर र मृत्युदरमा पनि कमी आएको छ । भाइरस संक्रमणबाट अहिलेसम्म बाँकेमा ३ सय ९ जना र उपचारका लागि जिल्ला बाहिरबाट आएका ३४० जनाको मृत्यु भएको छ।
Discussion about this post