जावेद अन्सारी
बाँके कार्तिक १८ गते ।
बाँके प्रहरीले ठूलो परिमाणमा नेपालबाट तस्करी हुँदै गरेको सुपारी बरामद गरेको छ । जिल्ला प्रहरी कार्यालय र जमुनाह प्रहरीको संयुक्त पहलमा ८ बोरा सुपारी बरामद गरिएको बाँकेका एसपी श्यामकृष्ण अधिकारीले अनलाइन खोजखबरलाई जानकारी दिनुभयो ।
जमुनाह नाकाको पूर्वबाटो भएर भारत निर्यात गर्ने क्रममा करिव १ लाख ५० हजार मूल्य बराबरको उक्त सुपारी बरामद भएको एसपी अधिकारीले बताउनुभयो ।
आटो रिक्सामा लैजानेक्रममा आटो रिक्सासहित सुपारी बरामद भएको हो । उक्त सुपारी कस्ले भारत निर्यात गर्दै थियो भन्ने एकिन खुल्न नसकेको र अनुसन्धान भइरहेको पनि प्रहरीले जनाएको छ ।
नेपालबाट सुपारी, केराउलगायत भारत तस्करी हुने गरेको छ । नेपालबाट यी सामाग्री भारत लैजाँदा त्यहाँ महंगोमा विक्री हुने गरेको छ । त्यही भएर तस्करहरुले यी सामाग्री खुलला सीमानाको फाइदा उठाउँदै भारत तस्कर गर्ने गरेका हुन् ।
बाँकेका एसपी अधिकारीले भारतबाट हुने र नेपालबाट हुने दुवै तस्करी रोक्न कडा निर्देशन दिएसँगै मातहतको निकायले सीमा क्षेत्रमा चेकजाँचलाई कडाइँ गर्दै आपराधिक गतिविधि तथा सीमा तस्करमा नियन्त्रण भइरहेको छ ।
विशेषगरी चाडपर्वको समयमा प्रहरी जनशक्ति पनि विदामा बस्ने र मानिसहरु फेस्टिबल मुडमा हुने भएकाले तस्करहरुले आपराधिक गतिविधि बढाउने गरेका छन् ।
Discussion about this post