बाँके भदौ १२ गते ।
रसुवाको भोटेकोशी नदीमा आएको भीषण बाढीबाट प्रभावित नागरिकको उद्धार तथा राहतका लागि बाँकेको नरैनापुर गाउँपालिकाले करिब २० लाख रुपैयाँ सहयोग गर्ने भएको छ ।
गाउँपालिकाले जनप्रतिनिधि, कर्मचारी र शिक्षकको पारिश्रमिकबाट निश्चित दिन बराबरको रकम कट्टा गरी प्रधानमन्त्री दैवी प्रकोप उद्धार कोषमा जम्मा गर्ने निर्णय गरेको हो ।
प्रमुख प्रशासकीय अधिकृत नवराज वलीका अनुसार जनप्रतिनिधि तथा अधिकृतस्तरका कर्मचारी र सोभन्दा माथिकाले सात दिनको तलब सहयोग गर्नेछन् । सहायकस्तरका कर्मचारीले पाँच दिनको तलब दिनेछन् ।
त्यस्तै, अधिकृतस्तरका शिक्षकले पाँच दिन र सहायकस्तरका शिक्षकले तीन दिनको तलब सहयोग गर्ने निर्णय भएको वलीले बताए ।
‘विपद् जुनसुकै ठाउँमा भए पनि प्रभावितको उद्धार, राहत र पुनःस्थापना साझा दायित्व हो,’ उनले भने, ‘गाउँपालिकाले आफ्नो क्षमताअनुसार सहयोग गर्ने निर्णय गरेको हो ।’
गाउँपालिका अध्यक्ष इस्तियाक अहमद शाहले विपद्मा परेका नागरिकलाई सहयोग गर्नु मानवीय दायित्व भएको बताए । ‘पीडितको साथमा उभिनु सबैको साझा जिम्मेवारी हो,’ उनले भने, ‘हाम्रो सहयोगले राहत र उद्धारमा केही योगदान पुग्ने विश्वास छ ।’
वरिष्ठ लेखा अधिकृत भरत बस्नेतका अनुसार निर्णयअनुसार सम्बन्धित जनप्रतिनिधि, कर्मचारी र शिक्षकको पारिश्रमिकबाट रकम कट्टा गरी प्रधानमन्त्री दैवी प्रकोप उद्धार कोषमा जम्मा गरिनेछ ।
सहायक लेखा अधिकृत प्रकाश अधिकारीले तलबबाट रकम कट्टा गर्ने प्रक्रिया अघि बढाइने बताए ।
Discussion about this post