बाँके माघ ७ गते ।
अपाङ्गता भएका महिलाहरुको आर्थिक सशक्तिकरणका लागि रोजगारदाताहरुसँग आज नेपालगन्जमा अन्तरक्रिया गरिएको छ ।
अपाङ्गता भएका महिलाहरुको आर्थिक अधिकार तथा रोजगारीमा पहुँच पुर्याउने उद्देश्यले एक्सेस प्लानेड अर्गनाइजेसनको आयोजनामा अन्तरक्रिया गरिएको हो ।
कार्यक्रममा सहभागी सम्वद्ध सरोकारवालाहरुले अपाङ्गता महिलाहरुको आर्थिक र रोजगारीमा पहुँच पुर्याउन आफुहरु प्रतिबद्ध रहेको बताए ।
नेपालगन्जका मेयर डा धवलशम्शेर राणा, नेपालगन्ज उद्योग बाणिज्य संघका महासचिव चिरञ्जीवि वली, नागरिक अगुवा कृष्णप्रसाद श्रेष्ठलगायतले अपाङ्गता भएका व्यक्तिहरुको सवालमा आफुहरु गम्भीर रहेको भन्दै उनीहरुलाई रोजगारीको बातावरण सिर्जना गरेर आत्मनिर्भर बनाउनेतर्फ लाग्ने प्रतिबद्धता जनाउनुभएको अर्गनाइजेशनका कार्यकारी निर्देशक लक्ष्मी नेपालले जानकारी दिनुभयो ।
कार्यक्रममा बोल्दै मेयर राणाले अपाङ्गता भएका महिलाको जिविकोपार्जनका लागि स्थानीय सरकार गम्भीर रहेको भन्दै सहकार्य गरेर अघि बढ्ने प्रतिबद्धता जनाउनुभयो । उहाँले अपाङ्गता भएका महिलालाई आर्थिक शसक्तिकरण र रोजगारीको वातावरण सिर्जना गर्ने खालको योजना ल्याउन पनि आग्रह गर्नुभयो ।
कार्यक्रममा बोल्दै उद्योग बाणिज्य संघका महासचिव वलीले अपाङ्गता भएका महिलाको आर्थिक सशक्तिकरणका लागि तीनै तहका सरकारले स्पष्ट नीतिगत व्यवस्था ल्याउन आवश्यक रहेको बताउनुभयो । त्यसो गर्न सकियो भने उनीहरुलाई रोजगारी दिन रोजगारदाता बाध्य हुने बताउनुभयो ।
त्यस्तै सोल्टी होटेलका प्रबन्ध निर्देशक प्रबन्ध निर्देशक प्रविन्द्र सिंहले होटलले रोजगारमा अपाङ्गता भएका व्यक्तिको पाँच प्रतिशत अनिवार्य गरिएको जानकारी दिनुभयो ।उहाँले अहिले पनि दुई जना अपाङ्गता भएका व्यक्तिलाई होटलमा रोजगारी दिइएको जानकारी दिनुभयो ।
कार्यक्रममा अपाङ्गता अभियान्ता भावुकजंग थापा, घरेलु तथा साना उद्योग महासंघ नेपालगन्जका अध्यक्ष डिला शाहलगायतले मन्तव्य राख्नुभएको थियो ।
Discussion about this post