बाँके, असोज १५ गते ।
जेनजी आन्दोलनका क्रममा ज्यान गुमाएका नेपालगन्जका दुई युवाको योगदानलाई जीवन्त राख्न नेपालगन्ज उपमहानगरपालिकाले उनीहरूको परिचय स्थानीय पाठ्यक्रममा समेट्ने तयारी गरेको छ।
नेपालगन्ज उपमहानगरपालिकाका नगर प्रमुख प्रशान्त विष्टले नयाँ पुस्तालाई जेनजी शहीदको योगदानबारे जानकारी गराउँदै उनीहरूको स्मृतिलाई जीवन्त राख्न स्थानीय पाठ्यक्रममा परिचय समेट्ने तयारी भइरहेको बताए।
शहीद परिवारको आग्रहबमोजिम उक्त कार्य तत्काल अघि बढाउने तयारी गरिएको उनले जानकारी दिए।
नगर प्रमुख विष्टका अनुसार नेपालगन्ज–१, धम्बोजीका १९ वर्षीय आयुष थापा र २३ वर्षीय सुलभ राज श्रेष्ठले गत वर्ष भदौ २३ गते काठमाडौंमा भएको जेनजी आन्दोलनका क्रममा ज्यान गुमाएका थिए। उनीहरूको सम्मान र सम्झनामा उपमहानगरपालिकाले विभिन्न भौतिक तथा सामाजिक कार्य अघि बढाएको उनले बताए।
सरकारी विवरणमा पनि थापा र श्रेष्ठलाई नेपालगन्ज–१, बाँकेका जेनजी शहीदका रूपमा उल्लेख गरिएको छ।
नेपालगन्ज उपमहानगरपालिका–१ का वडाध्यक्ष प्रमोद रिजालका अनुसार दुवै शहीदको स्मृतिमा धम्बोजीमा ‘शहीद योग भवन’ र खुला ‘जिम हाउस’ निर्माण गरिएको छ। उनका अनुसार शहीदद्वयको नाममा ‘शहीद प्रवेशद्वार’ समेत निर्माण भइरहेको छ।
‘वडा कार्यालय परिसरमा दुवै शहीदको स्मृतिमा शहीद योग भवन तथा खुला जिम हाउस निर्माण गरिएको छ,’ वडाध्यक्ष रिजालले भने, ‘उहाँहरूको सम्मानमा वाटरपार्क नजिकै अर्धकदको सालिक निर्माण गर्नुका साथै विशालनगर क्षेत्रमा उहाँहरूको नाममा शहीद प्रवेशद्वार निर्माण भइरहेको छ।’
उपमहानगरपालिकाले दुवै शहीदको स्मृतिमा ‘शहीद रनिङ शिल्ड’ प्रतियोगिता सञ्चालन गर्ने निर्णय गरेको पनि उपमहानगरपालिकाका प्रवक्तासमेत रहेका रिजालले बताए।
उनका अनुसार शहीद परिवारका समस्या र माग सम्बोधनका लागि स्थानीय सरकार परिवारसँग निरन्तर संवादमा रहेको छ।
जेनजी आन्दोलनका क्रममा नेपालगन्जको एउटै टोलका दुई युवाले ज्यान गुमाएपछि धम्बोजीका बासिन्दा पनि उक्त घटनाबाट अझै प्रभावित रहेको स्थानीय बताउँछन्।
शहीदको सम्झनामा उपमहानगरपालिका र वडा कार्यालयले विभिन्न भौतिक संरचना निर्माण गरिरहे पनि काठमाडौंमा आफ्ना छोराले ज्यान गुमाएको एक वर्ष बितिसक्दा पनि घटनाको निष्पक्ष छानबिन र दोषीमाथि कारबाही नभएको भन्दै शहीदका परिवार असन्तुष्ट छन्।
शहीद परिवारले सरकारसँग शहीदको सम्मान, परिवारका एक सदस्यलाई रोजगारी, घटनाको निष्पक्ष छानबिन र गोली चलाउनेमाथि कानुनी कारबाहीको माग गर्दै आएका छन्।
आन्दोलनका क्रममा निर्दोष युवाले ज्यान गुमाएको भन्दै घटनाको जिम्मेवारी लिने र दोषीमाथि कारबाही गर्ने काम हुन नसकेको शहीद आयुषका पिता सुशील थापाले बताए। सरकारले दोषीमाथि कारबाही गर्न नसक्नुको कारण स्पष्ट गर्नुपर्ने उनको माग छ।
नागरिक सरोकार मञ्च बाँकेका संयोजक कृष्णप्रसाद श्रेष्ठले जेनजी आन्दोलनका शहीदका चाहना र माग पूरा गर्ने जिम्मेवारी आन्दोलनपछि बनेको सरकारको रहेको बताए।
Discussion about this post