खोजखबर संवाददाता
हेटौंडा असोज ७ गते । हेटौंडाको चुरीयामाई नयाँ वस्तीमा गाँजा तस्करलाई गोली हानेर प्रहरीले नियन्त्रणमा लिएको छ । गाँजा बोकेको ट्रक र चेक जाँच गर्न ट्रकमा चढेका प्रहरी समेतलाई लिएर ट्रक भागेपछी मकवानपुर प्रहरीले तस्कर र गाँजा नियन्त्रणमा लिनका लागि दुई राउन्ड गोली प्रहार गरेको हो ।
गोली हानेर एकजना गाँजा तस्कर र गाँजा वरामद गरिएको जिल्ला प्रहरी कार्यालय मकवानपुरका प्रहरी उपरिक्षक मुकेश कुमार सिंहले वताउनुभयो । पक्राउ पर्नेमा पर्सा जिल्ला विरगंज महानगरपालिका २९ का अफ्रिका चौधरी रहेका छन् ।
हेटौंडाबाट पथलैया तर्फ जाँदै गरेको ना ६ ख १३१ नम्बरको ट्रक सुरक्षा जाँच गर्ने क्रममा ट्रकका चालक चौधरीले प्रहरी जवान सहित ट्रक्र भगाएका थिए । चालक चौधरी र ट्रकमा रहेका अर्का एक व्यक्तिले चुरियामाई नयाँ बस्तिमा ट्रक रोकि प्रहरी जवानलाई लछारपछार गर्दै जंगल तर्फ लैजादै गर्दा प्रहरीले उनलाई पछ्याएको थियो ।
इलाका प्रहरी कार्यालय पशुपतिनगरका प्रहरी निरिक्षक अरुण कुमार कुशवहाको नेतृत्वको टोलीले चालक चौधरीलाई नियन्त्रणमा लिने क्रममा उनको खुट्टामा दुई राउण्ड गोली प्रहार गरी नियन्त्रणमा लिएको हो ।
घटनामा दुईजना प्रहरी समेत घाइते भएको जिल्ला प्रहरी कार्यलय मकवानपुरका प्रहरी उपरिक्षक सिंहले आज आयोजित पत्रकार सम्मेलनमा जानकारी दिनुभयो । ट्रकको क्याविनबाट प्रहरीले १४ पोकामा रहेको ७८ किलो ८ सय ग्राम लागुऔषध गाँजा बरामद गरेको हो ।
Discussion about this post