बाँके बैशाख १ गते ।
२७ चैत रातको १०ः३० बजे रमजानको तरावी सकिएपछि नेपालगन्ज उपमहानगरपालिका ११, सुनारमण्डीका मोहम्मद असलम अन्सारीको परिवारका सवै सदस्य सँगै बसेर खाना खाए ।
खाना खाइसकेर अन्सारीका पत्नी, छोरा अली अन्सारी र आमा घुम्न निस्किए । उनीहरुको साथमा अन्सारीको घरमा डेरा गरि बस्ने समिना इद्रिसी र उनका चार बर्षिय नाती मोहम्मद कसिम इद्रिसी पनि थिए । उनीहरुको समुहमा तीन जना बालबालिका र पाँच जना महिला थिए ।
उनीहरु विपी चोकको पाँच सय मिटर उत्तरबाट फेरि विपी चोकतर्फ फर्किदै थिए । त्यतिबेला रातको ११ः४५ बजेको थियो । उत्तरबाट तीव्र गतिमा कार आयो र सवैभन्दा अगाडी रहेका पाँच बर्षिय मोहम्मद अलि अन्सारी, चार बर्षिय कसिम इद्रिसी र ६५ बर्षिया समिना इद्रिसीलाई सोहोरेर लग्यो ।
‘म र अन्य तीन जना सवैभन्दा पछाडी थियौँ । वीचमा मेरो आमा हुनुहुन्थ्यो । सवैभन्दा अगाडी मेरो हजुरआमा र दुई बालक थिए । तीब्र गतिमा आएको कारले सवैभन्दा अगाडी रहेका तीनै जनालाई पछाडीबाट हान्यो,’ प्रत्यक्षदर्शी समेत रहेकी मृतक अली अन्सारीकी आमा इरम अन्सारीले भनिन्, ‘तीव्र गतिमा रहेको गाडी हाम्रो अगाडीबाट कतिखेर छिर्यो हामीले पत्तोसमेत पाएनौँ ।
चिच्याएको मात्र सुन्यौँ । दौडेर जाँदा तीन जनाको ज्यान गइसकेको थियो ।’
तीन जनालाई ठक्कर दिएको कारमै हालेर घाइतेलाई नेपालगन्ज मेडिकल कलेज शिक्षण अस्पताल पुर्याइएको थियो । तर, अस्पताल पुर्याएको केहिबेरमै चिकित्सकले मृत घोषणा गरेका थिए । ‘तीन जनाको ज्यान लिएको कार ब्याक गरेर भाग्ने प्रयास गर्दै थियो । नजिकै रहेका यूवाले घेरा हालेर घाइतेलाई अस्पताल लैजान बाध्य पारे,’ उनले भनिन्, ‘आफ्नै आँखा अगाडी हिडिरहेको छोरा गुमाए ।’
खोजेको इरमले बताइन् ।
अली र कसिम एकदमै मिल्ने साथी थिए । उनीहरुलाई एकअर्काको नाम थाह भए पनि कहिलै नामले बोलाएनन् । उनीहरु दुवै जनाले ‘दोस्त’ भनेर बोलाउँथे । ‘कुनै सामान किन्नु पर्यो भने दुवैका लागि किन्थे । दुवैजनाका लागि सामान किन्ने पैँसा आमाबाबुसँग माग्थे,’ अली अन्सारीका बाबु अस्लम अन्सारीले भने, ‘कहिलै साथ नछुट्ने भएकोले त्यो रात पनि सँगै थिए । अपराधीले दुवैजनालाई एकैसाथ किचेर मार्यो ।’
अली अन्सारी र कसिम इद्रिसीको नयाँ लुगा लगाउने सपना अधुरै भएको छ । उनीहरु दुवै जनाले भोली पल्ट बजार गएर रमजानका लागि नयाँ लुगा किन्ने योजना बनाएका थिए, तर नयाँ लुगा किन्न पाएनन् । ‘छोराले भोली मासुभात खाने र नयाँ लुगा किन्ने भन्दै बाहिर निस्किएको थियो । नयाँ लुगा लगाएर रमजानमा रमाउने उसको सपना पूरा हुन पाएन,’ असलमले भने ।
छोरा, उसको साथी र घरमा डेरा गरेर बस्ने आमाको मृत्यू भएपछि अन्सारी परिवारको रमजान खल्लो भएको छ ।
रमाइलो गरि रमजानमा ब्रत बस्ने र खानपिन तथा नयाँ लुगा लगाएर रमाइलो गर्ने अन्सारी परिवारको योजनामा ब्रेक लागेको छ । रमजानको निराहार ब्रत बसे पनि कुनै रौनकता नभएको कसिमकी आमा आमना इद्रिसीले बताइन् । ‘रमाइलो गरि रमजान मनाउँदै थियौँ । एकै घरका तीन जनाको ज्यान जाने गरि भएको घटनाले रमजानको रौनक आँशुमा बदलिएको छ,’ उनले भनिन् ।
मृतकका परिवारले सवारी चालकलाई हदैसम्मको कारवाहीको माग गरेका छन् । उनीहरुले ज्यान मार्ने अभियोगमा मुद्धा चलाएर चालक माथि कानून बमोजिम कारवाही हुनुपर्ने अडानमा छन् ।
चालकसँग मिलेर प्रहरीले मुद्धा फितलो बनाउने चिन्ता उनीहरुलाई छ । ‘यो दुर्घटना होइन, जानी जानी घटाइएको घटना हो, चालकलाई आजिवन काराबासको सजाय हुनुपर्छ,’ स्थानीय सराफत खानले भने ।
मिलापत्रका लागि चालकका आफन्त र प्रहरीले दवाव दिएको अली अन्सारीका बाबु असलमले बताए । उनले चालकका पत्नीले म्यासेज गरेर आफ्नो पतिलाई पाँच मिनेटमा जेलबाट छुटाउने धम्की दिएको गुनासो गरे । ‘चालकका आफन्तले पैँसा लिएर मिल्न दवाव दिइरहेका छन् ।
उनका पत्नीले पाँच मिनेटमा आफ्नो पतिलाई छुटाउने धम्की सहितको एसएमएस पठाएकी छन्,’ उनले भने, ‘हामीलाई पैँसा चाहिदैन, चालकलाई आजिवन कारावासको सजाय हुनुपर्छ । हामीलाई अरु केहि चाहिदैन ।’
चालकलाई हदैसम्मको कारवाहीको माग गर्दै मृतकका आफन्तले विहीवार नेपालगन्जमा प्रदर्शन गरेका छन् । उनीहरुले विपी चोकमा टायर बालेर झण्डै चार घण्टा चक्काजाम समेत गरे ।
प्रहरीले चालकलाई उन्मुक्ति दिने खेल खेलको सूचना पाएपछि दवाव स्वरुप विपी चोकमा टायर बालेर प्रहरीलाई सजग गराएको असलमले बताए । मुद्धा नचलाएर प्रहरीले चालकलाई प्रहरी कार्यालयको हिरासतमा राखेको उनीहरुको आरोप छ ।
‘प्रहरीको चाल बुझेर हामीले दवाव स्वरुप टायर बालेर प्रदर्शन र चक्काजाम गर्यौँ ।
२ बैशाखसम्मको समय दिएको छ, त्यसपछि पनि मुद्धा चलाइएन भने थप संघर्षका कार्यक्रम गर्न बाध्य हुनेछौँ,’ उनले भने ।
(प्रत्यक्षदर्शीसँगको कुराकानीमा तयार पारिएको सामग्री)
Discussion about this post