बाँके असार ३० गते ।
बाँकेको सीमा सुरक्षार्थ खटिएको सशस्त्र प्रहरीको सेटिङमा भन्सार छलि भित्र्याइएको ठूलो परिणामको कपडा नेपाल प्रहरीले बरामद गरेको छ ।
तस्करसँगको मिलेमतोमा सशस्त्र प्रहरीले लाइन लिएर छाडेको लेडिज कुर्ता, कोट पाइन्ट र लेडिज सल नेपाल प्रहरीले बरामद गरेको हो ।
प्रहरीका अनुसार २ लाख १७ हजार एक सय रुपैयाँ बराबरको अवैध कपडा बरामद भएको छ । लेडिज कुर्ता १९६ पिस, कोट पाइन्ट १९ पिस र लेडिज सल २१ पिस बरामद भएको प्रहरीले जनाएको छ ।
सशस्त्र प्रहरीले लाइन लिएर तस्करसँग अवैध सामान भित्र्याउन सहयोगी भूमिका खेल्ने गरेको छ । सशस्त्र प्रहरीले हिरमिनिया क्षेत्रबाट काटेको बोइलर कुखुरा, बिजुलीबत्ती, चिनी, मल, कपडा, राँगा, खसी, लगायतका विभिन्न अवैध भन्सार छलीको सामान भित्र्याउने गरेको स्थानीय बताउँछन् ।
६५ किलोमिटर खुला सीमा रहेको बाँकेमा १० वटा सशस्त्र प्रहरीको विओपी पोष्ट छन् । सशस्त्र प्रहरीले गस्ती गरिरहेको बेला पनि तस्करी भैरहेको स्थानीय बताउँछन् ।
सशस्त्र प्रहरीले भारतबाट हुने अवैध गतिविधिलाई रोक्नु हो । तर त्यही सशस्त्र प्रहरी तस्करसँगको साठगाठमा कमाउ धन्दामा लाग्ने गरेको छ । जसका कारण सीमा अपराधका घटनाको जोखिम समेत बढेको छ ।
भारतबाट तस्करी गरि ल्याइएको अवैध भन्सार छलीलो सामान चर्को मूल्यमा बाँकेसहित बर्दिया, सुर्खेत, जुम्ला, दाङ लगायतका पहाडी जिल्लामा सम्पलाई गरिन्छ । जसका कारण राज्य कोषमा जम्मा हुने ठूलो राजश्वमा घाटा हुँदै गएको छ, भने नेपाली व्यापारीहरुसमेत ठूलो मारमा परेकाछन् ।
Discussion about this post