धनगढी भदौ २३ गते ।
२०७८ पुस ११ गते तत्कालीत संस्कृति, पर्यटन तथा नागरिक उड्डयनमन्त्री प्रेमबहादुर आलेको अध्यक्षतामा एउटा बैठक बसेको थियो।
नेपाल नागरिक उड्डयन प्राधिकरणको सोही बैठकले धनगढी विमानस्थलको विस्तार गर्न भन्दै एक अर्ब बजेट विनियोजन गर्ने निर्णय ग¥यो। धनगढीलाई क्षेत्रीय विमानस्थलको रुपमा विकास गर्न २५० बिघा जमिन अधिग्रहण गरेर १८ सय मिटरको धावनमार्गलाई बढाएर २ हजार ५ सय मिटरको बनाउने भनियो।
तर, स्रोत सुनिश्चित नै नगरी विनियोजन गरिएको सो बजेट अहिले आएर काम नलाग्ने भएको छ। एक अर्ब बजेटको हवाला दिएर तत्कालीन मन्त्रीले चर्चा कमाउन खोजेको विषय अहिले आएर खुलेको हो। चालू आर्थिक वर्षका लागि सरकारले कुनै बजेट विनियोजन नगरेको अवस्था रहेको गेटा विमानस्थल निर्माण तथा व्यवस्थापन समन्वय समितिका संयोजक लोकराज भट्टले गुनासो गरे।
‘विमानस्थल विस्तारका लागि अध्ययन अनुसन्धान गर्ने नाममा कमिसन, भत्ता तथा राज्यकोषको दोहन गर्ने कामबाहेक यसअघि गरिएका सबै चर्चा झुटो भएको अनुभूति भइरहेको छ’ उनले भने। विमानस्थल विस्तारका लागि स्थानीयको जग्गा खरिदबिक्री कार्य रोक्ने काम मात्र भएको उनले बताएका छन्।
Discussion about this post