बाँके असोज २८ गते ।
मंसिर ४ गते हुने निर्वाचनमा प्रतिनिधिसभामा बाँकेमा ३६ जना उम्मेदवार छन् ।
३ वटा निर्वाचन क्षेत्र रहेको प्रतिनिधिसभातर्फ क्षेत्र नम्बर १ बाट ११ जना, क्षेत्र नम्बर २ बाट १६ जना र क्षेत्र नम्बर ३ बाट ९ जना उम्मेदवार छन् । तर, बाँकेमा मुख्यतः द्विपक्षीय र त्रिपक्षीय प्रतिष्पर्धा हुने करिब निश्चितप्रायः छ ।
कतै कांग्रेस नेतृत्वको गठबन्धन तथा एमाले-राप्रपा गठबन्धन भने कतै ठूला दलहरुबीच नै मुख्य प्रतिपष्र्धा देखिन्छ ।
क्षेत्र नम्बर १ मा दलगत र स्वतन्त्र गरेर ११ उम्मेदवार मैदानमा उत्रिए पनि नेकपा माओवादी केन्द्रका महेश्वरजंग गहतरा अथक र नेकपा एमालेका सूर्यप्रसाद ढकालबीच प्रतिष्पर्धा छ ।
नेपाली कांग्रेस, नेकपा माओवादी केन्द्र, नेकपा एकीकृत समाजबादी र राष्ट्रिय जनमोर्चाको गठबन्धनबाट उम्मेदवार बनेका नेपाल सरकारका युवा तथा खेलकुद मन्त्री समेत रहेका अथकलाई राप्रपाको समेत समर्थन पाएका नेकपा एमालेका केन्द्रीय सदस्य एवम् बाँके जिल्ला इन्चार्ज ढकालले चुनौती दिँदैछन् ।
यहाँ मुख्य ठूला दलहरुबीच नै गठबन्धन भएकाले यी दुई उम्मेदवारबीच नै प्रतिष्पर्धा हुने देखिएको छ । ढकाल संसदीय चुनावमा पहिलोपटक भिड्न लागेका छन् । क्षेत्र नम्बर २ मा भने परिस्थिति फरक छ ।
यहाँ राप्रपा एमाले गठबन्धन, नेपाली कांग्रेस र जनता समाजवादी पार्टी (जसपा) नेपाल का उम्मेदवारबीच त्रिपक्षीय भिडन्त हुने आंकलन गरिएको छ । क्षेत्र नम्बर २ मा सत्ता गठबन्धनबीच तालमेल हुन सकेन ।
राप्रपाका महामन्त्री डा.धवल शमशेर राणा, जसपाका नेता मो. इस्तियाक राई र कांग्रेसका सुदिप नरसिंह राणाबीच प्रतिष्पर्धा हुने देखिएको छ । राणा नेपालगञ्जका निवर्तमान मेयर समेत हुन् ।
जसपाका कार्यकारिणी सदस्य राई निवर्तमान भौतिक पूर्वाधार तथा यातायात्र मन्त्री हुन् । उनी २०७४ मा यसै क्षेत्रबाट निर्वाचित भएका थिए । सुदिप नेपाली कांग्रेसका महाधिवेशन प्रतिनिधि हुन् ।
तरुण दलको राजनीतिबाट पार्टीमा स्थापित उनी तरुण दलका पूर्व केन्द्रीय सदस्य हुन् । उनी पहिलोपटक संसदीय चुनाव लड्दैछन् । बाँके ३ मा पनि रोचक प्रतिष्पर्धा हुने देखिएको छ ।
यहाँ सत्तारुढ गठबन्धनबाट नेपाली कांग्रेसका सहमहामन्त्री किशोरसिंह राठोरलाई एमाले राप्रपा गठबन्धनबाट एमालेका जिल्ला अध्यक्ष किष्मतकुमार कक्षपतिले टक्कर दिँदैछन् । यसअघि बर्दियाबाट चुनाव लड्दै आएका राठोर यसपटक बाँके ३ मा आएका छन् भने किष्मतले पहिलोपटक संसदीय चुनाव लड्दैछन् ।
गत बैशाखमा सम्पन्न स्थानीय चुनावमा वडा अध्यक्षहरुले पाएको मतका आधारमा यी उम्मेदवारहरुबीच नै प्रतिष्पर्धा हुने आंकलन गरिएको छ ।
स्थानीय चुनावको मत अनुसार क्षेत्र नम्बर १ मा सत्तारुढ गठबन्धन, क्षेत्र नम्बर ३ मा पनि सत्तारुढ गठबन्धन र क्षेत्र नम्बर २ भने जसपा र कांग्रेस एक्लाएक्लै प्रतिष्पर्धा गर्दा एमाले-राप्रपा गठबन्धनको मत बढी देखिन्छ ।
Discussion about this post