बाँके भदौ ११ गते ।
बाँकेका विभिन्न नाकाबाट तस्करी मौलाएको छ । चाडपर्व भित्रिएसँगै तस्करहरुले जिल्लाका विभिन्न नाकाहरुको प्रयोग गरेर तस्कर गर्दै आएका छन् ।
नेपालगन्ज भन्सार कार्यालयले भारतबाट नेपाल आयात हुने सामानमा भन्सार कडाइ गरेपछि सर्वसाधरणलाई ठूलो सास्ती भएको छ । तर तस्करी नियन्त्रणका लागि खटिएको सशस्त्र प्रहरी र तस्करहरुलाई भने फलिफाप भएको छ । भन्सारले भारतबाट आयात हुने एक सय भन्दा बढी मूल्यको सामानमा भन्सार शुल्क लिने गरेको छ । तर त्यसको फाइदा भने तस्कर र सशस्त्र प्रहरीलाई भएको छ ।
मुख्य नाका जमुनाहलाई नै तस्करहरुले प्रयोग गर्दै आएका छन् । सशस्त्र प्रहरीसँगको मिलेमतोमा ठूलो परिमाणमा अवैध तस्करी हुने गरेको पाइएको छ । तस्करहरुले विहान भन्सार कार्यालयबाट भन्सार अनुमतिको कागजात बनाउने गरेका छन् । त्यही कागज देखाएर उनीहरुले दिनभरी अवैध सामान भारतबाट भित्र्याउने गरेका छन् । यसमा सशस्त्र प्रहरीले तस्करहरुलाई साथ दिएको छ भने भन्सारका केही कर्मचारीको समेत समन्वय हुने गरेको स्रोत बताउँछ ।
अनलाइन खोजखवरलाई प्राप्त सूचना अनुसार सशस्त्र प्रहरीले हिंजोआज सकेसम्म आफै असुली रकम बुझदैनन् । नाकामा रहेका पसलहरुमा तस्करहरुले सशस्त्रको भाग छुट्याएर दिने गरेका छन् । त्यही पसलबाट सशस्त्रले आफ्नो भागको रकम बुझने गरेका छन् ।
सशस्त्र गणले नाका क्षेत्रमा घुमुवा खटाउने गरेको छ । तर घुमुवाहरुले तस्करसँगको सेटिङमा असुली धन्दामा लागेको स्रोतको भनाई छ । स्थानीयहरु भन्छन–‘घुमुवा हुन की तस्कर यहाँ छुट्याउन गाह्रो छ ।’ घुमुवाहरुले तस्करसँग यहाँसम्मको सेटिङ गरेका छन् की २०/२५ हजारको सामान बरामद गरेर आफ्नो माथिल्लो निकायलाई देखाउने र करोडौं मूल्यको सामान भित्र्याउने गरेका छन् ।
गणपतिको कडा निर्देशन भएपनि घुमुवाहरुले भने रकम असुलीको धन्दा छाडेका छैनन् । एकजना घुमुवाले तस्करहरुसँग भने–‘एसपीलाई के थाहा हुन्छ उहाँ (एसपी) एसीरुममा बस्ने हो फिल्डमा काम हाम्ले गर्ने हो । पैसा हाम्लाई दिए हुन्छ ।’
बाँकेका खडैचा, हिरमिनिया, भज्जुपुरुवा, नयाँ वस्ती, जयसपुर, पचपोखरा, साइगाउँ, बढैया, सैनिकलगायतका नाकाहरुबाट अवैध तस्करी हुने गरेको छ । नाकाबाट हुने अवैध ओसारपसार नियन्त्रण गर्ने पहिलो जिम्मा सशस्त्र प्रहरीको हो । तर सशस्त्र प्रहरी नै असुली धन्दामा लागेपछि नाकाबाट अवैध धन्दा मौलाउँदै गएको छ ।
नाकामा सशस्त्र प्रहरीसँगै नेपाल प्रहरी पनि खटिने गरेको छ । तर यि दुवै प्रहरी निकायबीचमा समन्वय र सहकार्यको समेत अभाव देखिने गरेको छ । अधिकांश सामानहरु अवैध रुपमा भित्र्ने गरेका कारण भन्सार कार्यालयको राजश्व समेत घटेको छ । चालू आर्थिक वर्षको साउन पहिलो महिनामै लक्ष्य भन्दा निकै कम राजश्व संकलन भएको भन्सारको तथ्यांकले देखाउँछ ।
Discussion about this post