बाँके भदौ १५ गते ।
सशस्त्र प्रहरी र स्थानीय वीच १४ भदौ राती करिव १० बजे भएको झडपमा नेपालगन्ज उपमहानगरपालिका १४ चौलिका चोकका १४ वर्षीय जैयद हास्मीको दाहिने आँखामा गम्भिर चोट लागेको छ । उनको भेरी अस्पतालमा प्रारम्भिक उपचार पछि फत्तेबाल आँखा अस्पताल नेपालगन्जमा रेफर गरिएको छ ।
स्थानीय र सशस्त्र प्रहरी विच चौलिका चोकमा झडप हुँदा हेर्न बाहिर निस्किएका हास्मीलाई सशस्त्र प्रहरीले बन्दुकको कुन्दाले हिर्काएको उनका दाजु शमिर खानले बताए । उनले सशस्त्र प्रहरीले बन्दुकको कुन्दाले हिर्काउँदा भाईको आँखा फुटेको बताए । सशस्त्र प्रहरीले स्थानीय महिलामाथि समेत हातपात गरेको बताउँदै उनले आक्रोशित स्थानीयले सशस्त्र प्रहरीमाथि ढुंगामुढा गरेको जिकिर गरे । ‘स्थानीय महिलाले घर खर्चका लागि एक–एक बोरा चामल ल्याइरहेका थिए । सशस्त्र प्रहरीले रोकेर एकाएक आक्रमण गरे,’ उनले भने, ‘त्यहि भिडमा रहेका मेरो भाईलाई बन्दुकको कुन्दाले हिर्काएर आँखा फुटाई दिए ।’
स्थानीय र सशस्त्र वीच करिव एक घण्टा झडप भएको सशस्त्र प्रहरी बल नेपाल नं। ३० गण बाँकेका सूचना अधिकारी समेत रहेका सशस्त्र प्रहरी नायव उपरीक्षक लक्ष्मण थापाले जैयदलाई सशस्त्र प्रहरीले बन्दुकको कुन्दाले नहानेको दावी गरे । उनले झडपका क्रममा स्थानीयले फालेको ढुंगा जैयदलाई लागेको ठोकुवा गरे । ‘हाम्रो टोलीले कसैलाई आक्रमण र धरपकड गरेको छैन । बरु स्थानीयले फालेको ढुंगा जैयदलाई लागेको हुनुपर्छ,’ उनले भने ।
स्थानीयले फालेको ढुंगा लागेर सशस्त्र प्रहरीका दुई जना जवान घाइते भएको बताउँदै उनले नेपाल प्रहरी आएपछि ढुंगामुढा रोकिएको बताए । ‘स्थानीयभन्दा हाम्रोतर्फ धेरै क्षति भएको छ । गाडीको सिसा फुटेको छ । दुई वटा ढालासमेत भाँचिएको छ,’ उनले भने ।
उनले स्थानीयले यसअघि पनि आक्रमण गरेको आरोप लगाए । ‘उहाँहरुले भारतबाट निर्वाध रुपमा सामान ल्याउन पाउनु पर्छ भन्नुहुन्छ । हामीले राज्यको नियम अनुसार राजस्व तिर्नुस भन्छौँ । भारतबाट निर्वाध रुपमा सामान ल्याउन नपाउँदा उहाँहरुले हामीमाथि आक्रमण गर्नुहुन्छ । अहिले पनि त्यहि भएको हो,’ थापाले भने ।
तर, स्थानीयले सशस्त्र प्रहरीको दावीमा कुनै सत्यता नभएको बताउँछन् । स्थानीय शमिर खानले चामल ल्याउँदै गरेका महिलामाथि सशस्त्रले हातपात गरेपछि स्थानीयले ढुंगामुढा गरेको आरोप लगाउँछन् । ‘सशस्त्र प्रहरीको ज्यादती विरुद्ध स्थानीयले ढुंगामुढा गरेका हुन् । स्थानीयको तर्फबाट ढुंगामुढा भएपछि प्रहरीले बल प्रयोग गरि बन्दुकको कुन्दा र लात्तिले हिर्काए,’ उनले भने ।
Discussion about this post