बाँके भदौ १८ गते ।
१४ भदौ राती करिव १० बजे तिर नेपालगन्ज उपमहानगरपालिका १४ चौलिकाका १४ वर्षीय जैयद हास्मी तारेको माछा खान चौलिका चोकमा निक्लिए । तारेको माछा, कुखुराको मास, पकौडा र अन्य परिकार खानेकोे चौलिका चोकमा भिड थियो । त्यहि भिडमा जैयद पनि थिए ।
उनी तारेको माछा खाँदै गर्दा दक्षिणतर्फबाट भागदौड भयो । जैयदलाई झगडा भयो होला भन्ने लाग्यो । उनी आफ्नो सुर र तालमा माछा खाइरहे । त्यहाँ सशस्त्र प्रहरी र स्थानीय वीच दोहोरो ढुंगामुढा चल्न थाल्यो । आफूले केहि नगरेकोले किन भाग्ने भन्ने लाग्यो जैयदलाई । उनी नभागेर माछा खाइरहेका थिए । सशस्त्र प्रहरीले सर्वसाधारणलाई लखेटिरहेको थियो । ‘मैले कुनै गल्ती गरेको छैन, किन भाग्ने भन्ने मलाई लाग्यो । म माछा खाइरहेको थिएँ । दक्षिणतर्फबाट आएका सशस्त्र प्रहरीले मलाई बन्दुकको कुन्दाले आँखामा हिर्काए । म बेहोस भएर ढलेँ, त्यसपछि के भयो मलाई कुनै जानकारी भएन,’ उनले भने ।
उनी कामका लागि विहान १० बजे धम्बोझी पुग्थे । बेलुका ७–८ बजे घर फर्किन्थे । उनी स्टिलको झ्याल, ढोका बनाउने पसलमा काम सिक्दै थिए । काम सिक्ने भएकोले उनले मासिक ५–६ हजार पारिश्रमिक पाउँथे । ‘कुनै महिना धेरै हुन्थ्यो, कुनै महिना थोरै पाउँथे । जे भए पनि गुजारा चलिरहेकै थियो,’ उनले भने, ‘अव एउटा आँखाले कसरी काम गर्ने होला ।’
घटना भएको दिन जैयदका आमाबुवा भारतको नानपारास्थित बहिनीको घरमा थिए । बहिनीको जेठानीको अन्तिम संस्कारमा सहभागी हुन नानपारा गएको बाबु रज्जब ढपालीले बताए । ‘छोराको आँखामा गम्भिर चोट लागेको जानकारी पाएपछि हामी हतार हतार घर आयौँ । हामी घरमा भएको भए छोरा बाहिर जाने थिएन की ?’ उनले भने ।
सशस्त्र प्रहरी राइफलको कुन्दाले हिर्काउँदा जैयदको दाहिने आँखा फुटेको आमा रुक्साना ढापालीले बताइन् । उनले आँखामा हिर्काउने सशस्त्र प्रहरीको पहिचान गरि कारवाही गर्नुपर्ने र आँखाको बदला आँखा उपलब्ध हुनुपर्ने माग गरिन् । ‘हाम्रो छोरालाई आँखाको बदला आँखा चाहिन्छ नभए उसको जिम्मा राज्यले लिनु पर्यो,’ उनले भनिन् ।
रज्जब र रुक्सानाले सशस्त्र प्रहरी विरुद्ध प्रहरीमा उजुरी दिने तयारी गरेका छन् । आइतवार जाहेरी लेखेर तयार भइसकेको र दर्ता गर्ने तयारी भइरहेको जैयदका दाई समिर खानले बताए । उनले ज्यान मार्ने उद्योगमा जाहेरी तयार भएको बताउँदै सोमवार मुद्धा दर्ता हुने बताए ।
जैयदको फत्तेबाल आँखा अस्पताल नेपालगन्जमा उपचार भइरहेको छ । अस्पतालले आँखा फुटेको जवाफ दिइसकेको आमा रुक्सानाले बताइन् ।
यो पनि पढ्नुस
चौलिका चोकमा सशस्त्रद्धारा महिलामाथि हातपात, बच्चाको आँखा फुट्यो
Discussion about this post