बाँके चैत १२ गते ।
रंगको पर्व होलीलाई लक्षित गरि बाँके प्रहरीले जेकजाँचमा कडाई गरेको छ । सामाजिक एवम् धार्मिक सद्भाव विग्रिन नदिन बाँके प्रहरीले नेपालगन्जको १० बढि ठाउँमा चेकजाँच गर्ने ब्यवस्था मिलाएको बाँकेका प्रहरी प्रवक्ता डिएसपी नारायण डाँगीले जानकारी दिए ।
बाँके लगायत तराईका जिल्लामा आज होली मनाइदै छ । फाटफुट रुपमा आइतवार मनाए पनि विशेष रुपमा आज मनाउने भएको छ ।
होली मनाउने ठाउँको पहिचान गरि सुरक्षा ब्यवस्था कडा पारिएको बताउँदै सादा पोशाकमा समेत प्रहरी परिचालन गरिएको डिएसपी डाँगीले बताए । ‘अप्रिय घटना हुन नदिन र सामाजिक एवम् धार्मिक सद्भाव कायम राख्न ठाउँ–ठाउँमा प्रहरी परिचालन गरिएको छ,’ उनले भने ।
होली मनाउन सुरु भएसँगै ट्राफिक प्रहरीले पनि सवारी साधन चेकजाँचमा कडाइ गरेको छ । होलीलाई व्यवस्थित बनाउन र सवारी दुर्घटना हुन नदिन ट्राफिक प्रहरीले चेकजाँचमा कडाइ गरेको हो ।
होली पर्वको अवसरमा मादक पदार्थ सेवन गरि सवारी साधन चलाउने, उछृङ्खल गतिविधि गर्ने, सहमति विना लोला हान्ने जस्ता गतिविधि रोक्न प्रहरीले चेकजाँचमा कडाइ गरेको डिएसपी डाँगीले बताए । नेपालगन्जको धम्बोझी, बिपि चोक, ट्राफिक चोक, त्रिभुवन चोक, सदरलाईन त्रिवेनी मोड, सेतु बिक चोक, फुल्टेक्रा पुष्पालाल चोक, राँझा लगायत जिल्लाको विभिन्न स्थानमा प्रहरीले चेकजाँच गर्ने छ,’ उनले भने ।
नेपाल प्रहरीले होलीलाई सुव्यवस्थित बनाउन आग्रह गरेको छ । सम्भावित दुर्घटनाबाट जोगिन घरको छत लगायत जोखिमपूर्ण स्थानमा बसेर होली नखेल्न र मादक पदार्थ सेवन गरि तीव्र गतिमा सवारी साधन नचलाउन आग्रह गर्दै बाँके प्रहरीले सहमति बिना अरुलाई लोला नहान्न र रंग नदल्न पनि सेचत गराएको छ । ‘होली खेल्ने ठाउँ र सार्वजनिक स्थलमा ड्रोनबाट पनि निगरानी गरिने छ,’ डिएसपी डाँगीले भने ।
शान्त र मर्यादित वातावरणमा होली खेल्न बाँके प्रशासनको आग्रह
जिल्ला प्रशासन कार्यालय बाँकेले शान्त, सौम्य र मर्यादित वातावरणमा होली पर्व मनाउन आग्रह गरेको छ । ‘रङहरुको माध्यमबाट एकआपसम खुसी साटासाट गर्ने फागु पर्व (होली) पर्वलाई भव्य, सभ्य र उच्च सद्भावपूर्ण तुल्याउँदै हर्ष, उल्लासमय वातावरणमा मनाउने हामी सवै नागरिकको कर्तव्य नै हो,’ बाँकेका प्रमुख जिल्ला अधिकारी श्रवणकुमार पोखरेलले जारी गरेको सूचनामा उल्लेख छ ।
इच्छा बिपरित जवर्जस्ती रङ नदल्न, रङ नछ्याप्न र लोला नहान्न पनि उनले सचेत गराएका छन् ।
मादक पदार्थ सेवन गरि सवारी नचलाउन, सवारी साधनमा क्षमता भन्दा बढी नबस्न र अनियन्त्रित हुने गरि तिब्र गतिमा सवारी साधन नचलाउन पनि नचलाउन पनि प्रशासनले जारी गरेको सूचनामा उल्लेख छ । ‘होहल्ला, झैँझगडा नगर्न, सार्वजनिक शान्ति र सुब्यवस्थामा खलल पुग्ने कार्य नगर्न सचेत गराइन्छ,’ प्रजिअ पोखरेलले जारी गरेको सूचनामा भनिएको छ ।
उच्च ध्वनी प्रदुषण हुने गरि उपकरणहरुको प्रयोग नगर्न, प्रयोग गर्दा ध्वनी प्रदुषण नहुने तर्फ सजग रहन र सामाजिक सद्भाव भड्काउन प्रोत्साहन हुने कुनै पनि गतिबिधीमा संलग्न नरहुन पनि उनले सूचनामा उल्लेख गरेका छन् । बाँके लगायत तराईका जिल्लामा भोली सोमवार होली मनाइने भएको छ ।
Discussion about this post