बाँके जेठ २९ गते ।
राप्ती सोनारी गाउँपालिकाका अध्यक्ष तप्त बहादुर पौडेलले बालविवाह अन्त्यका लागि सबैको भूमिका महत्वपूर्ण रहेको बताएका छन् ।
लुम्विनी प्रदेश सरकार महिला बालबालिका तथा ज्येष्ठ नागरिक मन्त्रालय देउखुरीको आयोजना तथा राप्ती सोनारी गाउँपालिकाको समन्वयमा गाउँपालिका कार्यालय अगैयामा सोमवार भएको बालविवाह अन्त्यका लागि प्रदेशस्तरीय रणनीतिको कार्यान्वयन सम्वन्धी अभिमुखिकरण कार्यक्रममा अध्यक्ष पौडेलले सो कुरा बताएका हुन् ।
उनले बालविवाह अन्त्यका लागि जनचेतनामुलक कार्यक्रमको आवश्यकता समेत औल्याए । पछिल्लो समय प्रविधिको विकासले पनि बालविवाह न्यूनीकरण चुनौतीपूर्ण बनेको उनको तर्क थियो । बालविवाहले पार्ने अल्पकालीन तथा दीर्घकालीन असरका बारेमा राम्रोसँग बालबालिका तथा अभिभावकहरुलाई जानकारी गराउनुपर्नेमा उनको जोड छ ।
‘तुलनात्मक रुपमा घरपरिवारबाटै बालविवाह गराउने परिपाटीमा सुधार आएको छ उनले भने–‘तर प्रविधिको विकासका कारण आफै बालविवाह गर्ने प्रवृत्ति बढेको छ । यसको रोकथाम चुनौतीपूर्ण छ ।’ गाउँपालिकाका उपाध्यक्ष मनिषा सिंह थारुले बालविवाह अन्त्यका लागि बनेको नीतिगत तथा कानुनी कुराहरुको कार्यान्वयन आवश्यक रहेको बताइन् ।
उनले बालविवाह न्यूनीकरणका लागि समाजमा शिक्षा फैलाउनुपर्नेमा जोड दिइन् । बालविवाह न्यूनीकरणका लागि प्रदेशस्तरीय रणनीति बनाइएको छ । उक्त रणनीतिको कार्यान्वयन गर्न स्थानीय सरकारले प्रभावकारी भूमिका निर्वाह गर्ने पनि उनले बताइन् । कार्यक्रममा सम्वद्ध सरोकारवाला निकायहरुको सहभागिता रहेको थियो ।
Discussion about this post