दश लाख ५ हजार पर्ने अवैध सामान नेपालगन्जबाट बरामद

बाँके असार १९ गते ।
वडा प्रहरी कार्यालय नेपालगन्जले ठूलो परिमाणमा अवैध सामान बरामद गरेको छ ।
नेपालगन्ज उपमहानगरपालिका–२१ बसन्त मल्ल चोक नजिकबाट १० लाख पाँच हजार रुपैयाँ मूल्य पर्ने मोबाइलमा प्रयोग गरिने टेम्पर ग्लास बरामद गरेको वडा प्रहरी कार्यालयका प्रमुख प्रहरी निरीक्षक हरिबहादुर बिसीले जानकारी दिए ।

वडा प्रहरी कार्यालयकाबाट खटिएको गस्ती टोलीले बुधबार बिहान ५ बजे भारतबाट अवैध रुपमा ल्याउदै गरेको अवस्थामा विभिन्न थरिका मोबाइलमा प्रयोग गरिने टेम्पर ग्लास ९ हजार दुई सय ८० पिस बरामद भएको उनले बताए । प्रहरी टोलीलाई देख्ने बित्तिकै भारतबाट भन्सार राजस्व छलेर अवैध रूपमा भित्र्याउँदै गरेको सामान छोडेर तस्करहरू भागेपछि बेवारिसे अवस्थामा प्रहरीले उक्त सामान फेला पारेको प्रहरी निरीक्षक बिसीले बताए । सामान बरामद भए पनि सम्बन्धित ब्यक्ति पक्राउ नपरेको उनले बताए ।

उनका अनुसार, प्रहरीले दुई लाख ५६ हजार रुपैयाँ पर्ने एक हजार दुई सय ८० पिस Ratto कम्पनीको मोबाईल ग्लास, तीन लाख ८४ हजार मूल्य पर्ने चार हजार आठ सय पिस Premium कम्पनीको मोबाइल ग्लास र दुई लाख ५६ हजार रुपैयाँ बराबरको तीन हजार दुई सय पीस Curved कम्पनीको मोबाईल ग्लास बरामद गरेको छ ।

प्रहरीले भे १ प ४७६५ नम्वरको सुपरस्पिलिन्डर र भारतिय नम्वर प्लेटको यूपी ४० ए ९२०२ टिभिएस मोटरसाईकल बरामद गरेको छ । तीनवटा साईकल पनि बरामद गरेको प्रहरीले जनाएको छ ।