काठमाडौं माघ १९ गते ।
निर्वाचन आयोगले आसन्न प्रतिनिधिसभा निर्वाचनलाई लक्षित गर्दै मतदाता नामावली र मतपत्र छपाइको कामलाई तीव्रता दिएको छ।
आइतबार आयोजित नियमित पत्रकार सम्मेलनमा आयोगका प्रवक्ता नारायणप्रसाद भट्टराईले मतपत्र तथा मतदाता नामावली छपाइ कार्य प्राथमिकताका साथ अघि बढाइएको जानकारी दिए। उनका अनुसार समानुपातिक तर्फको मतपत्र छपाइको काम सम्पन्न भइसकेको छ भने प्रत्यक्ष तर्फको मतपत्र छपाइ तीव्र गतिमा भइरहेको छ।
प्रवक्ता भट्टराईका अनुसार हालसम्म प्रत्यक्ष तर्फका २५ जिल्लाका लागि करिब ३० लाख मतपत्र छपाइ सम्पन्न भइसकेको छ। समानुपातिक तर्फ आवश्यक दुई करोड ८ लाख ३० हजार मतपत्रको छपाइ कार्य भने पूर्ण रूपमा सकिएको आयोगले जनाएको छ।
गएको हप्तादेखि प्रत्यक्ष तर्फका मतपत्र छपाइ सुरु गरिएको हो। प्रत्यक्ष तर्फ कुल करिब दुई करोड मतपत्रमध्ये अझै १ करोड ७० लाख मतपत्र छपाइ गर्न बाँकी रहेको आयोगले जानकारी दिएको छ।
आयोगका अनुसार दैनिक १२ देखि १५ लाखको संख्यामा मतपत्र छपाइ भइरहेको छ। त्यस्तै, मतदाता नामावली छपाइको काम पनि आगामी हप्ताभित्र सकिने अपेक्षा गरिएको छ।
प्रवक्ता भट्टराईले भने, “हामीले यो हप्ता मतपत्र र मतदाता नामावली छपाइलाई प्राथमिकतामा राखेका छौँ। सम्भवतः आउने हप्तासम्म मतदाता नामावली छपाइ पूरा हुन्छ। समानुपातिक तर्फ आवश्यक सबै मतपत्र छापिसकिएको छ र प्रत्यक्ष तर्फको छपाइ पनि तीव्र रूपमा अघि बढिरहेको छ।”
आयोगले मतपत्र छपाइको जिम्मेवारी जनक शिक्षा केन्द्रलाई दिएको छ। आयोगका अनुसार मतपत्र छपाइको कार्य विकट तथा हिमाली जिल्लालाई प्राथमिकतामा राखेर सुरु गरिएको हो।
Discussion about this post