बाँके फागुन १९ गते ।
फागुन २१ गते हुने प्रतिनिधिसभा सदस्य निर्वाचनलाई लक्षित गर्दै बाँकेको नेपाल–भारत सीमा क्षेत्रमा सुरक्षा व्यवस्था कडा पारिएको छ।
निर्वाचनलाई शान्तिपूर्ण र मर्यादित रूपमा सम्पन्न गराउने उद्देश्यले नेपाल–भारत सीमामा उच्च सतर्कता अपनाइएको दुबै देशका सुरक्षा अधिकारीहरूले जनाएका छन्। सोही क्रममा सीमा नाकाको सुरक्षा अवस्थाबारे जानकारी लिन भारततर्फबाट उच्च सुरक्षा अधिकारीहरूको टोलीले जमुनाहा नाकासहित रुपैडिहास्थित सुरक्षा चेकपोस्टहरूको अनुगमन गरेको छ।
भारतको बहराइच जिल्लाका अपर पुलिस अधीक्षक दुर्गा प्रसाद तिवारी, नानपाराका क्षेत्राधिकारी पहुपसिंह तथा रुपैडिहाका थाना इन्चार्ज रमेशसिंह रावतलगायतको टोलीले जमुनाहा नाकासम्म पुगेर सुरक्षा व्यवस्थाको समीक्षा गरेको हो।
सीमामा खटिएका भारतीय सुरक्षाकर्मीहरूलाई आवश्यक निर्देशन दिँदै अपर पुलिस अधीक्षक तिवारीले नेपालको निर्वाचन सफल बनाउन उच्च सतर्कता अपनाउनुपर्नेमा जोड दिए। उनले यसका लागि नेपाली सुरक्षाकर्मीहरूसँग समन्वय र सहकार्य गर्न निर्देशन दिएका छन्। पत्रकारहरूसँग कुरा गर्दै तिवारीले नेपालमा हुन लागेको संसदीय निर्वाचनलाई ध्यानमा राखी क्षेत्रको निरीक्षण गरिएको बताउँदै निर्वाचन सफल बनाउन सीमाना बन्ददेखि सुरक्षा कडाइसम्म आवश्यक सहयोग गरिने स्पष्ट पारे।
रुपैडिहा थाना प्रमुख रावतले निर्वाचन तथा होली पर्वलाई लक्षित गरी सुरक्षा व्यवस्था कडा पारिएको जानकारी दिए। उनले जमुनाहा इलाका प्रहरी कार्यालयसँग निरन्तर समन्वय भइरहेको पनि बताए। उता, बाँकेका प्रमुख जिल्ला अधिकारी दिलकुमार तामाङले निर्वाचनलाई लक्षित गर्दै सीमामा विशेष निगरानी बढाइएको र सुरक्षा व्यवस्था सुदृढ पारिएको बताए।
उनका अनुसार सीमा नाकामा नेपाल र भारत दुवै देशका सुरक्षाकर्मीले संयुक्त गस्ती तथा कडाइका साथ चेकजाँच गरिरहेका छन्।प्रतिनिधिसभा सदस्य निर्वाचनलाई मध्यनजर गर्दै फागुन १८ गते राति १२ बजेदेखि फागुन २१ गते राति १२ बजेसम्म नेपाल–भारत जमुनाहा नाका पूर्ण रूपमा बन्द गरिएको छ।
Discussion about this post