महोत्तरी चैत १ गते ।
महोत्तरीको रामगोपालपुर क्षेत्रमा प्रहरीले करिब १०९ किलोग्राम गाँजासहित भारतीय नम्बर प्लेटको एक कार नियन्त्रणमा लिएको छ।
जिल्ला प्रहरी कार्यालय महोत्तरीका अनुसार विशेष सूचनाको आधारमा गए राति करिब साढे ११ बजे रामगोपालपुर नगरपालिका–८ स्थित हरिणमरिण–सहसौला कच्ची सडक खण्डमा चेकजाँचका क्रममा गाँजा बरामद गरिएको हो।
प्रहरीका अनुसार महोत्तरीको पूर्व–पश्चिम लोकमार्ग हुँदै भारततर्फ जाँदै गरेको डीएल १ सीओ ५८६९ नम्बरको डस्टर कार शङ्कास्पद अवस्थामा रोकिएको अवस्थामा फेला परेको थियो।
बर्दीबासस्थित लागू औषध नियन्त्रण ब्युरो कार्यालयका प्रमुख सरोज अधिकारी तथा इलाका प्रहरी कार्यालय रामगोपालपुरबाट खटिएको संयुक्त गस्ती टोलीले कार जाँच गर्दा पछाडिको डिक्कीमा लुकाइछिपाइ राखिएको २० पोका गाँजा बरामद भएको जिल्ला प्रहरीका निरीक्षक विश्वम्भरनाथ साहले जानकारी दिए।
बरामद गाँजा र कार प्रहरीले नियन्त्रणमा लिएको छ। कार चालक भने फरार रहेको र उनको खोजी कार्य जारी रहेको प्रहरीले जनाएको छ।
घटनास्थल बर्दीबासबाट करिब ३० किलोमिटर दक्षिणतर्फ पर्छ। घटनाबारे थप अनुसन्धान भइरहेको प्रहरीले जनाएको छ।
Discussion about this post