बाँके, भदौ ४ गते ।
बाँकेको बैजनाथ गाउँपालिका–१ चिसापानीस्थित रत्न राजमार्गमा गरिएको लागुऔषध परीक्षणमा २५ जनामध्ये ८ जनामा सेवन गरेको पाइएको छ।
सडक दुर्घटना न्यूनीकरण तथा सुरक्षित सडक यात्रा प्रवद्र्धन गर्ने उद्देश्यले जिल्ला ट्राफिक प्रहरी कार्यालय बाँके र इलाका प्रहरी कार्यालय कोहलपुरले बुधबार संयुक्त रूपमा परीक्षण अभियान सञ्चालन गरेका हुन्। अभियानमा लुम्बिनी प्रदेश प्रहरी अस्पताल नेपालगन्जले प्राविधिक सहयोग गरेको थियो।
अभियानका क्रममा सार्वजनिक बस, विद्युतीय सवारी, अटो, मोटरसाइकल र स्कुटर चालकसहित केही यात्रुको मल्टिपल ड्रग टेस्ट किटमार्फत परीक्षण गरिएको जिल्ला ट्राफिक प्रहरी कार्यालय बाँकेका प्रमुख प्रहरी निरीक्षक कनकबहादुर शाहीले बताए।
उनका अनुसार परीक्षण गरिएका २५ जनामध्ये ८ जनामा लागुऔषध सेवन गरेको पोजेटिभ देखिएको हो। पोजेटिभ देखिएका व्यक्तिलाई थप अनुसन्धान तथा आवश्यक कानुनी कारबाहीका लागि इलाका प्रहरी कार्यालय कोहलपुरको नियन्त्रणमा राखिएको उनले बताए।
‘पोजेटिभ देखिएका व्यक्तिहरू लागुऔषध सेवनमा मात्र संलग्न हुन् वा कारोबारमा समेत संलग्न छन् भन्ने विषयमा अनुसन्धान भइरहेको छ,’ उनले भने, ‘अनुसन्धानपछि प्राप्त तथ्यका आधारमा कानुनी प्रक्रिया अघि बढ्छ।’
शाहीका अनुसार लागुऔषध तथा मादक पदार्थ सेवन गरेर सवारी चलाउँदा दुर्घटनाको जोखिम बढ्ने गरेको छ। ‘लागुऔषध र मादक पदार्थ सेवन गरेर सवारी चलाउनु सडक सुरक्षाका लागि गम्भीर चुनौती हो,’ उनले भने, ‘दुर्घटना न्यूनीकरणका लागि ट्राफिक प्रहरीले यस्ता परीक्षणलाई निरन्तरता दिइरहेको छ।’
प्रहरीका अनुसार रत्न राजमार्गमा सञ्चालन हुने सवारी साधनका चालक तथा यात्रुलाई लक्षित गरी आगामी दिनमा पनि यस्ता परीक्षण र सचेतनामूलक अभियान सञ्चालन गरिनेछ।
Discussion about this post