कपिलवस्तु, भदौ ३ गते ।
वाणगंगा नगरपालिका–९ जिनुवास्थित कालिका सामुदायिक वनबाट प्रहरीले पाँच नाल भरुवा बन्दुक बरामद गरेको छ। वन क्षेत्रमा बेवारिसे अवस्थामा लुकाइराखिएका बन्दुक प्रहरीले फेला पारेको हो।
जिल्ला प्रहरी कार्यालय कपिलवस्तुका अनुसार बरामदमध्ये तीन नाल साबुत र दुई नाल बेसाबुत अवस्थामा छन्।
जिल्ला प्रहरी कार्यालय कपिलवस्तुका प्रहरी नायब उपरीक्षक रिपेन्द्रकुमार सिंहले सामुदायिक वन क्षेत्रमा बेवारिसे अवस्थामा बन्दुक फेला परेपछि नियन्त्रणमा लिएर अनुसन्धान अघि बढाइएको बताए। ‘वन क्षेत्रमा बेवारिसे अवस्थामा पाँच नाल भरुवा बन्दुक फेला परेका छन्,’ उनले भने, ‘तीमध्ये तीन नाल साबुत र दुई नाल बेसाबुत अवस्थामा छन्।’
बन्दुक कसले, कहिले र के प्रयोजनका लागि वन क्षेत्रमा लुकाएर राखेको हो भन्नेबारे अनुसन्धान भइरहेको प्रहरीले जनाएको छ। बरामद हतियारसँग सम्बन्धित व्यक्ति तथा सम्भावित आपराधिक गतिविधिबारे समेत प्रहरीले अनुसन्धान अघि बढाएको छ।
Discussion about this post