दाङ, भदौ ३ गते ।
दाङको घोराहीमा सरकारी अनुदानमा प्राप्त रासायनिक मल कालोबजारी गर्न खोजेको आरोपमा चार जनाविरुद्ध मुद्दा दायर भएको छ ।
प्रहरी अनुसन्धान प्रतिवेदनका आधारमा घोराहीका सोहनलाल चौधरी र कृष्णबहादुर चौधरी तथा बङ्गलाचुलीका दिवाकर खत्री र खिमबहादुर घर्तीविरुद्ध कालोबजारी तथा सामाजिक अपराध तथा सजाय ऐन, २०३२ अन्तर्गत मुद्दा दायर गरिएको हो ।
प्रहरीका अनुसार उनीहरूलाई साउन २८ गते राति घोराही उपमहानगरपालिका–७ सिसहनियाबाट पक्राउ गरिएको थियो । ट्याक्टरमा डिएपी र युरिया मल राखेर बिक्री वितरणका लागि लैजाँदै गरेको अवस्थामा उनीहरू पक्राउ परेका हुन् । प्रहरीले ट्याक्टरसहित ५३ बोरा डिएपी र चार बोरा युरिया मल बरामद गरेको थियो ।
जिल्ला सरकारी वकिल कार्यालय दाङका सहायक जिल्ला न्यायाधिवक्ता श्रीधर अधिकारीका अनुसार उक्त मल कृषि सामग्री कम्पनी लिमिटेडबाट लक्षित किसानलाई वितरण गर्ने प्रयोजनका लागि सहकारीको नाममा खरिद गरिएको थियो । तर, किसानलाई वितरण नगरी महँगो मूल्यमा बिक्री गर्न खोजेको अनुसन्धानबाट खुलेको छ ।
अनुसन्धानका क्रममा बङ्गलाचुली गाउँपालिका–५ स्थित सहकारीका लागि साउन २८ गते १३० बोरा डिएपी र १८० बोरा युरिया खरिद गरिएको देखिएको अधिकारीले बताए ।
सरकारी अनुदानमा प्राप्त मल तोकिएको मूल्यभन्दा बढीमा बिक्री गरी किसानलाई ठगी गर्न खोजेको प्रमाण भेटिएपछि कानुनी कारबाही अघि बढाइएको उनले बताए ।
मुद्दा दायर गरिएका चारै जनालाई ऐनअनुसार कैद तथा जरिवानाको सजाय माग गरिएको छ । बरामद मल जफत गरी सम्बन्धित सहकारी वा कृषि सामग्री कम्पनीमार्फत किसानलाई उचित मूल्यमा बिक्री वितरण गर्ने व्यवस्था मिलाउनसमेत माग गरिएको छ ।
Discussion about this post